દહેજ પોલીસે જુગારિયાઓ પાસેથી 81 હજાર રોકડા સહિત 2.86 લાખનો મુદ્દામાલ જપ્ત કર્યો
ભરૂચ.
દહેજ પોલીસ સ્ટેશનનો સ્ટાફ પેટ્રોલિંગમાં હતો. તે વેળાં તેમને ચોક્કસ બાતમી મળી હતી કે, રહિયાદ ગામની સીમમાં L&T કંપની પાસે આવેલાં હનુમાનજી મંદિરની બાજુમાં નર્મદા નદીના કિનારે ખુલ્લામાં કેટલાંક શખ્સોએ જુગારની મહેફિલ જમાવી હોવાની ચોક્કસ બાતમી મળી હતી. જેના પગલે ટીમે સ્થળ પર દોડી જઇ દરોડો પાડતાં જુગારિયાઓમાં દોડધામ મચી હતી. જોકે, પોલીસે તે પૈકીના યુવરાજ ભાયલાલ ગોહિલ, ભાયલાલ મગન ચૌહાણ, મયુર મહેન્દ્ર પરમાર, બળવંત રામસંગ ગોહિલ, રાકેશ દિનેશ ગોહિલ તેમજ રાજુ જયંતી સોલંકીને ઝડપી પાડ્યાં હતાં. જ્યારે ભાગી ગયેલાંઓ અંગેની પુછપરછ કરતાં તેમના નામ રણજીત નારસંગ ગોહિલ, દિલીપ ઉર્ફે દેવો ભરત ગોહિલ તેમજ કૌશિક જયંતી સોલંકી હોવાનું માલુમ પડ્યું હતું. ટીમે સ્થળ પરથી તેમજ દાવ પર લાગેલાં રોકડા રૂપિયા મળી કુલ 81,550 રૂપિયા રોકડા, એક બુલેટ, એક જ્યુપીટર તેમજ એક સ્પ્લેન્ડર મળી કુલ 2.86 લાખથી વધુની મત્તાનો મુદ્દામાલ જપ્ત કર્યો હતો. ટીમે તમામ વિરૂદ્ધ જુગારધારા હેઠળ ગુનો નોંધી ફરાર જુગારિયાઓને ઝડપી પાડવાના ચક્રોગતિમાન કર્યાં છે.
