ભરૂચ શહેરમાં ચેન સ્નેચિંગની વધતી ઘટનાઓ વચ્ચે શહેર સી ડિવિઝન પોલીસને મહત્વપૂર્ણ સફળતા મળી છે. પાર્સલ આપવાના બહાને વૃદ્ધોને નિશાન બનાવી સોનાની ચેન લૂંટતો એક શાતિર આરોપી પોલીસના જાળમાં ફસાયો છે.
તુલસીધામ વિસ્તારમાં આવેલી ચિત્રકૂટ સોસાયટીમાં રહેતી એક વૃદ્ધ મહિલાને સ્વીગીનું પાર્સલ આપવાનું કહી આરોપીએ ઘર બહાર બોલાવી હતી. તે દરમિયાન એક્ટિવા પર આવેલા આરોપીએ અચાનક મહિલાના ગળામાંથી સોનાની ચેન ખેંચી લઈને ફરાર થવાનો પ્રયાસ કર્યો હતો. ઘટનાની જાણ થતાં જ સી ડિવિઝન પોલીસે તરત જ કાર્યવાહી શરૂ કરી હતી.
પોલીસે શીતલ સર્કલથી રેલવે સ્ટેશન સુધીના વિસ્તારોમાં નાકાબંધી અને વોચ ગોઠવી હતી. આ દરમિયાન સફેદ એક્ટિવા પર ફરતા શંકાસ્પદ ઈસમને અટકાવી તપાસ કરવામાં આવી હતી. પૂછપરછ દરમિયાન તેની ઓળખ કિશોર ઉર્ફે અજય મોહન માછી, રહેવાસી વડોદરા તરીકે થઈ હતી. ત્યારબાદ તેની ધરપકડ કરવામાં આવી હતી.
સઘન પૂછપરછમાં આરોપીએ ગુજરાતના વિવિધ શહેરોમાં લગભગ 20 જેટલી ચેન સ્નેચિંગની ઘટનાઓ કરી હોવાનું સ્વીકાર્યું હતું. ઉપરાંત તાજેતરમાં વડોદરામાં પણ પાર્સલ આપવાના બહાને એક વૃદ્ધ વ્યક્તિની ચેન લૂંટ્યાની કબૂલાત તેણે આપી હતી.
હાલ પોલીસે આરોપીની પાસેથી અંદાજે રૂ.40 હજારની કિંમતની એક્ટિવા જપ્ત કરી છે. પાર્સલ ડિલિવરીનો બહાનો બનાવી ચેન સ્નેચિંગ કરવાની મોડ્સ ઓપરેન્ડી અંગે વધુ વિગતો મેળવવા પોલીસે તપાસ વધુ વિસ્તારી છે.
