કપડવંજના હેમતાજીના મુવાડા તાબના વડાલીમાં મોપેડ નામે કરવાની તકરારમાં ભાણીયાએ મામા અને મામી પર છરીથી હુમલો કર્યો હતો. ગંભીર રીતે ઘવાયેલા મામાને હોસ્પિટલમાં ખસેડતા મૃત જાહેર કર્યા હતા.ત્યારે ઝઘડામાં વચ્ચે પડેલા મામીને પણ છરી મારી ઘાયલ કર્યા હતા.
કપડવંજના હેમતાજીના મુવાડા તાબાના વડાલીમાં રહેતા દિનેશભાઇ રોહિતે અઢી વર્ષ અગાઉ મોપેડ લીધું હતું. જેના રૂ. ૨૨ હજાર ડાઉન પેમેન્ટ ભર્યુ હતુ અને બાકીની લોન કરી હતી. દરમિયાન દિનેશભાઈને કાર લેવાની હતી તેથી મોપેડ પોતાના ભાણીયા મેહુલને આપ્યુ હતુ. તેમાં ડાઉન પેમેન્ટ ના પૈસા ભાણીયા પાસેથી લઇ બાકીની લોન છે તે ભાણીયા મેહુલને ભરવાની તેમ નક્કી થયું હતુ. પરંતુ બાકીના હપ્તા સમયસર ન ભરવાથી પેનલ્ટી લાગી હતી. જેથી ભાણીયાએ મામાને કહ્યું હતું કે તમારી પાસેથી લીધેલ મોપેડ મારા નામે કરાવવું છે, જેથી તમે પેનલ્ટીના હપ્તા ભરી દો અને મામાને અપશબ્દો બોલી પેટના ભાગે છરી મારી હતી.ગંભીર રીતે ઘવાયેલા મામાને હોસ્પિટલમાં ખસેડતા મૃત જાહેર કર્યા હતા ત્યારે ઝઘડામાં વચ્ચે છોડાવવા પડેલા મામીને કપાળમાં છરી મારી ઇજા પહોંચાડી હતી. આ બનાવ અંગે પોલીસે ભાણિયાને ઝડપી એક દિવસના રિમાન્ડ મેળવ્યા છે.
નરેશ ગનવાણી : નડિયાદ
