લીબડી સબ જેલમાં માંસાહારી પદાર્થ નહીં લઈ જવાનુ હોવાથી ફરજ પરના પોલીસ કર્મી ટીફીન લઈ જવાની ના પાડતાં જે વાતનુ મનદુઃખ રાખીને કેદીએ પોલીસ કર્મી ઉપર ઢીકાપાટુ વડે હુમલો કરી માર મારીને ઈજાઓ પહોંચાડી જાનથી મારી નાખવાની ધમકી આપી હતી. ઈજાગ્રસ્ત પોલીસ કર્મીને સારવાર અર્થે હોસ્પિટલમાં ખસેડવામાં આવ્યાં હતાં.
લીંબડી સબ જેલમાં ગાર્ડ કમાન્ડર તરીકે ફરજ બજાવતા હતાં પોલીસ હેડ કોન્સ્ટેબલ વિનોદભાઈ ભવાનભાઈ સોલંકી એ લીંબડી પોલીસ સ્ટેશનમાં ફરિયાદ નોંધાવતાં જણાવ્યું હતું કે તેઓ સબ જેલમાં ફરજ પર હતાં. તે સમયે સબ જેલમાં નો કેદી દિલાવરભાઈ ધીરૂભાઈ દેવી પુજક રહે. ખાડીયા વાળાના કોઈ સગા સંબંધી તેમની માટે ટીફીન લઇને આવ્યા હતા. ત્યારે મામલતદારના આદેશ મુજબ આ ટીફીનની ચકાસણી કરતાં તેમાં માંસાહારી વાનગી જેવા પદાર્થ હોવાથી દિલાવરને ટીફીન જમવા માટે આપ્યું નહોતું. તે વાતનુ મનદુઃખ રાખીને દિલાવરે ઉશ્કેરાઈને ગાળો બોલીને પોલીસ કર્મી વિનોદભાઈ પર ઢીકાપાટુ વડે માર મારીને ઈજાઓ પહોચાડી હતી. તેમજ સબ જેલમાં અન્ય પોલીસ કર્મી છુટા પડાવા જતાં તેમને પણ જેમ ફાવે તેમ ગાળો આપીને જાનથી મારી નાખવાની ધમકીઓ આપી હતી. પોલીસે આ બનાવ અંગે દિલાવર વિરૂદ્ધ ફરિયાદ નોંધીને વધુ તપાસ હાથ ધરી હતી.
કલ્પેશ વાઢેર સુરેન્દ્રનગર
