સૌજન્ય-તાલાલા: ગીર જંગલનાં દ્વાર મંગળવારે પ્રવાસીઓ માટે ખુલ્લા મુકાતા સાસણ આરક્ષીત અભયારણ અને દેવળીયા સફારી પાર્કમાં સિંહ દર્શન કરવા દરરોજ નકકી કરવામાં આવેલી તમામ પરમીટો વેંચાઇ હતી. સાસણ વન વિભાગ દ્વારા પ્રવાસીઓનું સ્વાગત કરવામાં આવેલ અને શુભેચ્છા સાથે સ્વચ્છતાનો સંદેશ આપી પ્રવાસીઓને જંગલ દર્શન માટે રવાના કર્યા હતાં.
સાસણ અભયારણ્ય અને દેવળીયા પાર્કમાં સો ટકા પરમીટો વેચાઇ
ચોમાસાનાં ચાર માસ બાદ ગીરનું જંગલ મંગળવારે પ્રવાસીઓ માટે ખુલ્લુ મુકવામાં આવેલ. ગીર અભયારણમાં ઇસ્યુ કરાતી 150 પરમીટો તમામ વેંચાઇ હતી. જયારે દેવળીયામાં જાળીવાળી જીપ્સીનાં નવા કોન્સેપ્ટને ભારે પ્રતિસાદ મળતા દર કલાકે દસ જીપ્સીનાં કવોટામાં 6 કલાકની 60 જીપ્સીઓ સામે 58 જીપ્સીઓમાં પ્રવાસીઓ સિંહ દર્શન માટે ગયેલા. વેકેશન બાદ 2018-19ની સિઝનનાં પ્રથમ દિવસે સિંહ દર્શન માટે આવેલા પ્રવાસીઓનું સાસણ વન્ય પ્રાણી વિભાગે સ્વાગત કરેલ અને જંગલ દર્શન દરમિયાન નિયમોનું પાલન કરવા ઉપરાંત ગીર જંગલને પ્લાસ્ટીક મુકત જંગલ બનાવવાનાં વન વિભાગનાં પુરૂષાર્થને સહકાર આપવાની અપીલ સાથે વાસીઓને જંગલમાં રવાના કરાયા હતાં. પ્રવાસીઓને ડેડકડી, કેરંભા, કમલેશ્વર વિસ્તારમાં સિંહ પરિવારો જોવા મળતા પ્રવાસીઓ આનંદીત બની ગયા હતાં. આગામી દિવસોમાં દિવાળીનાં તહેવારો દરમિયાન દેશ ભરમાંથી પર્યટકોનો ભારે ઘસારો રહેશે અને વિદેશી પર્યટકોમાં પણ સિંહ દર્શનનું જબરૂ આકર્ષણ છે.
