વડોદરાના અલકાપુરીમાં કાર ધડાકાભેર ક્રોકરી શોપમાં ધુસતા ગ્રાહકોમાં નાસભાગ

વડોદરાના બરોડા પ્રોડક્ટિવિટી રોડ વિસ્તારમાં ગઈ રાતે એક ક્રોકરી શોપમાં કાર ઘુસી જતા ભારે નુકસાન થયું હતું. કાર દૂકાનમાં ઘૂસી જતાં થોડો સમય માટે અફરા-તફરી મચી ગઇ હતી. બનાવની જાણ થતાં પોલીસ પહોંચી હતી અને આગળની કાર્યવાહી હાથ ધરી હતી. વડોદરાના અલકાપુરી વિસ્તારમાં આવેલા બીપીસી રોડ પર એક ક્રોકરીનો શોરૂમ આવેલો છે. ગઇકાલે રાત્રે એક મહિલા કાર લઇને શોપિંગ કરવા આવી હતી, એ સમયે કાર બેકાબૂ બનતાં કાર કાચ તોડીને શોરૂમમાં ઘૂસી ગઇ હતી. જેના કારણે ક્રોકરી શોપમાં આવેલા ગ્રાહકોમાં નાસભાગ મચી ગઇ હતી.

એક સમયે હાજર લોકોના જીવ પડીકે બંધાઈ ગયા હતા. શોરૂમનો આગળનો ભાગ કાચની બનેલો હોવાથી ચારેબાજુ કાચના ટૂકડા વિખેરાયા હતા. સદનસીબે આ વિચિત્ર અકસ્માતમાં કોઇ જાનહાની થઇ ન હતી. અકસ્માતના પગલે શો રૂમમાં મુકેલા ક્રોકરીના સામાનને પણ નુકસાન પહોંચ્યું હતું. બનાવ અંગે પોલીસને જાણ કરતા ગોત્રી પોલીસે કારચાલક સામે ગુનો નોંધી કાર્યવાહી કરી છે.