વડોદરા શહેરના ડભોઇ રોડ ગણેશ નગર ખાતે સંબંધીના ખબર અંતર પૂછવા ગયેલ દંપતીના બંધ મકાનને નિશાન બનાવી ત્રાટકેલ અજાણ્યા તસ્કરો તિજોરીના લોકરમાંથી રૂપિયા 90 હજારની કિંમતના સોના ચાંદીના ઘરેણા ચોરી ફરાર થઈ જવાનો બનાવ પાણીગેટ પોલીસ મથકે નોંધાયો છે.
આ અંગેની વિગત એવી છે કે, શહેરના ડભોઇ રોડ ઉપર આવેલ ગણેશ નગરમાં રહેતા કાનજીભાઈ માળી પાન પડીકીનો ગલ્લો ધરાવે છે. વિતેલા વર્ષે 18 ડિસેમ્બરના રોજ તેઓ પાદરા ખાતે સંબંધીના ખબર અંતર પૂછવા માટે ગયા હતા. જ્યાં રાત્રિ રોકાણ કર્યા બાદ બીજા દિવસે સવારે પાડોશીએ તેમના મકાનમાં ચોરી થયાની જાણ કરી હતી. તપાસ કરતા અજાણ્યા તસ્કરો દરવાજાના નકુચા તોડી ઘરમાં પ્રવેશી તિજોરીના લોકરમાંથી સોનાની વીંટી, સોનાનું લોકેટ, ચાંદીના પાયલ, સોનાની માળા સહિત કુલ 90 હજારની મત્તા ચોરી ફરાર થયાનું બહાર આવ્યું હતું. ચોરીમાં ગયેલ દાગીનાના બિલ મળી આવતા ફરિયાદ નોંધાવી છે.
