ભરૂચ જિલ્લાના ઝઘડિયા તાલુકાના ઉમલ્લા પોલીસની હદમાં ગઇકાલે પોલીસે કુલ રૂ.૬૪૫૬૦૦ ના મુદ્દામાલ સાથેનો વિદેશી દારૂ ઝડપી લીધો હતો. ઉમલ્લા પોલિસ વિસ્તારમાં નાઈટ પેટ્રોલિંગમાં હતા, તે દરમિયાન બાતમી મળી હતી કે સંજાલી ગામના કેનાલની બાજુમાં સીમાડા વગામાં સંજાલી ગામનો સંદીપ સંજય વસાવા એસ.યુ.વી ગાડીમાં ગેરકાયદેસર રીતે ભારતીય બનાવટનો વિદેશી દારૂનો જથ્થો મંગાવી સંતાડી રાખેલ છે. ઉમલ્લા પોલીસે બાતમીના આધારે સંજાલી ગામની સીમમા કેનાલની બાજુમાં છાપો માર્યો હતો, ત્યારે બાતમી મુજબની એસયુવી લક્ઝરીયર્સ ગાડી મળી આવી હતી.
આ ગાડીમાં તપાસ કરતા અલગ અલગ બ્રાન્ડની કુલ ૩૪૫૬ નંગ ભારતીય બનાવટની વિદેશી દારૂની બોટલો મળી આવતા જપ્ત કરી હતી. ઉમલ્લા પોલીસે રૂ. ૩,૪૫,૬૦૦ નો વિદેશી દારૂ તથા મહિન્દ્રા કંપનીની એસયુવી ગાડી રૂપિયા ૩ લાખની કિંમતની મળી કુલ રૂપિયા ૬,૪૫,૬૦૦ નો મુદ્દામાલ જપ્ત કર્યો હતો. પોલીસે સંદીપ સંજય વસાવા રહેવાસી સંજાલી તા. ઝઘડિયા વિરુદ્ધ ગુનો નોંધી તપાસ હાથ ધરી હતી.
ગુલામહુશેન ખત્રી રાજપારડી જિ.ભરૂચ
