ભરૂચ જિલ્લાના ઝઘડીયા તાલુકાના ગોવાલી ગામે ફાર્મ હાઉસ ધરાવતા એક ઇસમને ગોવાલીના એક સહિત ત્રણ ઇસમોએ માર મારીને જાનથી મારી નાંખવાની ધમકી આપતા ઝઘડીયા પોલીસ મથકે ફરિયાદ નોંધાવા પામી છે.
મળતી વિગતો મુજબ અંકલેશ્વરના હાંસોટ રોડ પર રહેતા ધીરેન્દ્રસિંહ રઘુવીરસિંહ રાઠોડ ગતરોજ ઝઘડીયા તાલુકાના ગોવાલી ગામે પોતાના ફાર્મ હાઉસ પર હાજર હતા તે દરમિયાન ગોવાલી ગામનો હરેશભાઇ મગનભાઈ પાટણવાડીયા નામનો ઇસમે તને મસ્તી ચઢી ગઇ છે આજે તને જાનથી મારી નાંખીશુ,એમ ધમકી આપતા ધીરેન્દ્રસિંહ ગભરાઇ ગયા હતા અને તેઓ પોતાની મોપેડ ગાડી લઇને ફાર્મહાઉસ તરફથી ગોવાલી ગામ તરફ આવી રહ્યા હતા ત્યારે ગામના બસ સ્ટેન્ડ નજીક તેમને રોકીને હરેશ પાટણવાડીયાએ તેમને લાકડાના દંડા વડે મારતા પગ પર ઇજા થઇ હતી, તેમજ જાંગના ભાગે પણ ચાર પાંચ સપાટા માર્યા હતા. ઉપરાંત હરેશની સાથેના અન્ય ઇસમે પણ તેમને બરડાના ભાગે ત્રણેક સપાટા મારીને એકટિવા મોપેડને પણ નુકશાન કર્યુ હતુ. આ બાબતે ધીરેન્દ્રસિંહ રાઠોડ રહે.હાંસોટ રોડ અંકલેશ્વરનાએ હરેશ મગનભાઈ પાટણવાડીયા તેમજ અન્ય બે અજાણ્યા ઇસમો વિરુધ્ધ ઝઘડીયા પોલીસમાં ફરિયાદ લખાવતા પોલીસે ગુનો નોંધી તપાસ હાથ ધરી હતી.
ગુલામહુશેન ખત્રી રાજપારડી જિ.ભરૂચ
