ભરૂચ જિલ્લાના ઝઘડીયા તાલુકાના એક ગામનો કલ્પેશભાઇ દેવનભાઇ વસાવા નામનો યુવક ગત જાન્યુઆરી માસમાં તેના ગામની જ એક સગીર વયની યુવતીને લગ્ન કરવાના ઇરાદે પટાવી ફોસલાવીને ભગાડી લઇને નાસી ગયો હતો. આ બાબતે તે સમયે ઉમલ્લા પોલીસમાં ફરિયાદ લખાવવામાં આવતા પોલીસે આ યુવકની ધરપકડ કરી હતી. પોલીસ કાર્યવાહી બાદ આ યુવકને ભરૂચ સબજેલ ખાતે લઇ જવાયો હતો.
જાણવા મળ્યા મુજબ ત્યારબાદ તેને જામીન પર મુક્ત કરવામાં આવ્યો હતો. આ સગીર યુવતી છેલ્લા પંદર દિવસથી તેના અન્ય સંબંધીને ત્યાં રાજપારડી નજીકના એક ગામે રહેતી હતી. દરમિયાન ગતરોજ તા.૪ ના રોજ આ યુવતી વહેલી સવારે કોઇને કંઇ કહ્યા વિના ક્યાંક જતી રહી હતી. આ બાબતે પરિવારજનોએ યુવતીને શોધવા છતાં તેની કોઇ ભાળ મળી ન હતી, તેથી અગાઉ જે કલ્પેશ વસાવા નામનો યુવક તેને લગ્ન કરવાના ઇરાદે ભગાડી ગયો હતો તેજ યુવક જામીન પર છુટ્યા બાદ ફરીથી આ સગીર યુવતીને ભગાડી ગયો હોવાની શંકા આ સગીરાના પરિવારે વ્યક્ત કરી હતી. આ અંગે સગીર યુવતીની માતાએ રાજપારડી પોલીસમાં ફરિયાદ લખાવી હતી. યુવતીની માતાની ફરિયાદના આધારે રાજપારડી પોલીસે ગુનો નોંધી તપાસ હાથ ધરી હતી.
ગુલામહુશેન ખત્રી રાજપારડી જિ.ભરૂચ
