ભરૂચ જિલ્લાના ઝઘડીયા તાલુકાના અવિધા ગામે રાત્રી દરમિયાન મોટરસાયકલ સવાર બે યુવકોને કોઇ બે અજાણ્યા ઇસમોએ માર માર્યો હોવા બાબતની ઘટના બનવા પામી છે.
રાજપારડી પોલીસમાંથી મળતી વિગતો મુજબ અવિધા ગામે રહેતો નિલકુમાર અખિલેશભાઇ પટેલ નામનો યુવક ઝઘડીયા જીઆઇડીસીમા નોકરી કરે છે.તા.૨૦ મીના રોજ આ યુવક તેના મિત્ર શ્રેયસકુમાર મિસ્ત્રી સાથે રાતના સાડા નવ વાગ્યાના અરસામાં મોટરસાયકલ લઇને સરકારી દવાખાનાની સામે આવેલ સ્થળે ગયા હતા અને ત્યાં થોડીવાર બેસીને પાછા ઘરે આવવા નીકળ્યા હતા. તે સમયે દવાખાનાની બહારની લાઇટો બંધ હતી, અને તે દરમિયાન બે અજાણ્યા ઇસમોએ મોટરસાયકલ રસ્તા પર ઉભી રખાવી દીધી હતી. પાછળ બેસેલ શ્રેયસને આ બન્ને અજાણ્યા ઇસમોએ મોટરસાયકલ પરથી નીચે ઉતારી દીધો હતો. બાઇક ચાલક નિલકુમાર પણ મોટરસાયકલ પરથી નીચે ઉતર્યો હતો. બાદમાં આ બે અજાણ્યા ઇસમોએ આ લોકો સાથે ઝપાઝપી કરી હતી અને એક ઇસમે સળિયા જેવી કોઇ વસ્તુથી નિલકુમારને કપાળ પર સપાટો મારતા તે જમીન પર પડી ગયો હતો. આ અજાણ્યા ઇસમોએ ઝપાઝપી કરીને મોટરસાયકલ સવાર આ બન્ને યુવકોને સપાટા મારીને ઇજાગ્રસ્ત કર્યા હતા. ત્યારબાદ મોટરસાયકલ સવાર યુવકોએ તેમનો પ્રતિકાર કરતા તેઓ નાસી ગયા હતા. ઇજાગ્રસ્ત યુવકોએ અવિધા સરકારી દવાખાને સારવાર લીધી હતી. આ ઘટના અંગે નિલકુમાર અખિલેશભાઇ પટેલ રહે.અવિધા તા.ઝઘડીયા જિ.ભરૂચનાએ રાજપારડી પોલીસમાં માર મારી ઇજા પહોંચાડનાર બે અજાણ્યા ઇસમો વિરુધ્ધ ફરિયાદ લખાવતા પોલીસે ગુનો નોંધી તપાસ હાથ ધરી હતી.
ગુલામહુશેન ખત્રી રાજપારડી જિ.ભરૂચ
