ઝઘડિયા તાલુકાના ફુલવાડી ગ્રામ પંચાયતના ઉપસરપંચ તરીકે સંદિપ પટેલની વરણી.

ભરૂચ જિલ્લાના ઝઘડીયા તાલુકાના ફુલવાડી ગ્રામ પંચાયત ખાતે આજરોજ ઉપસરપંચની વરણી માટે બેઠક મળી હતી. તાજેતરમાં યોજાઇ ગયેલ ગ્રામ પંચાયતની ચૂંટણીમાં ફુલવાડીના ગામ અગ્રણીઓ નરેન્દ્રભાઈ પટેલ તેમજ કિરણભાઈ પટેલ સમર્થિત પેનલના કુલ આઠમાંથી છ ઉમેદવારો વિજયી થયા હતા, અને સરપંચ પદે રામુભાઈ શંકરભાઈ વસાવા ચૂંટાઈ આવ્યા હતા. આજરોજ ઉપસરપંચની વરણી માટે અધ્યાસી અધિકારી યાશીનભાઇ વોરાના અધ્યક્ષ સ્થાને મળેલ ગ્રામ પંચાયતની બેઠકમાં ઉપસરપંચ તરીકે સંદિપભાઈ કંચનભાઈ પટેલની વરણી કરવામાં આવી હતી. આ પ્રસંગે સરપંચ અને ઉપ સરપંચે ગ્રામજનોનો આભાર વ્યક્ત કરતા જણાવ્યું હતું કે તેઓ ગામના વિકાસ માટે પોતાનું યોગદાન આપવા હંમેશાં પ્રયત્નશીલ રહેશે અને ગામના સર્વાંગી વિકાસ માટે ગ્રામજનોનો સહયોગ મળતો રહે તેવી લાગણી સાથે પોતાને વિજયી બનાવવા બદલ સહુનો આભાર માન્યો હતો.

ગુલામહુશેન ખત્રી રાજપારડી જિ.ભરૂચ