ભરૂચ જિલ્લાના ઝઘડીયા ખાતેની જીઆઇડીસીમાં એક કંપની નજીક આવેલ ખેતરમાંથી કોઇ અજાણ્યા પુરુષનો અર્ધ બળેલ હાલતમાં નગ્ન અવસ્થામાં મૃતદેહ મળી આવ્યો હતો.
આ અંગે ઝઘડીયા પોલીસમાંથી પ્રાપ્ત વિગતો મુજબ ઝઘડીયા તાલુકાના દધેડા ગામના ઉદેસિંગભાઇ વસાવા નામના ખેડૂતનું એક ખેતર ઝઘડીયા જીઆઇડીસીમાં આવેલું છે. આ ખેતરમાં તુવેરનું વાવેતર કરેલું છે. ગતરોજ તા.૨૧ મીના રોજ રાત્રી દરમિયાન આ ખેતરમાં એક અજાણ્યા પુરુષનો અર્ધ બળેલ અને નગ્ન હાલતમાં મૃતદેહ પડેલ હોવાનું જણાતા તલોદરાના રહીશ વિઠ્ઠલભાઈ છગનભાઈ વસાવાએ આ અંગે ઝઘડીયા પોલીસમાં જાણ કરતા પોલીસે મૃતદેહનો કબજો લઇને જરુરી કાર્યવાહી હાથ ધરી હતી. વધુમાં મળતી વિગતો મુજબ આ ખેતરમાંથી પસાર થતી ભારે દબાણવાળી વીજ લાઇનના થાંભલા ઉપર ભડાકો થયો હતો, અને પોલીસ તપાસ દરમિયાન તેનાથી આ ઇસમનું બળી જવાથી મોત થયુ હશે એમ મનાય છે. જોકે હાલતો આ અજાણ્યા મૃતકની ઓળખ થઇ શકી નથી. અને આ ઇસમ કોણ છે, ક્યાંનો છે અને આ સ્થળે કેમ આવ્યો હતો તે બાબતો પણ હાલતો રહસ્ય સર્જે છે. ત્યારે વીજ થાંભલા પર ભડાકો થવો અને આ ઇસમનો અર્ધ બળેલ હાલતમાં મૃતદેહ મળવો એ બાબતે ઝઘડીયા પોલીસે ઘટના સંદર્ભે આગળની કાર્યવાહી કરીને તપાસ હાથ ધરી હતી.
ગુલામહુસેન ખત્રી રાજપારડી જી.ભરુચ
