ભરૂચ જિલ્લાના ઝઘડીયા તાલુકાના દુ.માલપોર ગામે આડા સંબંધના વહેમમાં બે પરિવારો વચ્ચેના ઝઘડામાં એક મહિલા સહિત કુલ ચાર ઇસમો સામે પોલીસમાં ફરિયાદ નોંધાવા પામી હતી.
ઝઘડીયા પોલીસમાંથી મળતી વિગતો મુજબ દુ.માલપોર ગામે રહેતા દિનેશભાઇ શાંતિલાલ વસાવાની ભાણી તેમની સાથે રહે છે. તેમની ભાણી સાથે ફળિયામાં રહેતા મિતેશ વસાવાને આડો સંબંધ હોવાનો શક હોવાથી દિનેશભાઇના માતા આજુબેન ગત તા. ૯ મીના રોજ મિતેશના ઘરે આ બાબતે કહેવા ગયા હતા. તુ અમારી ભાણીને કેમ હેરાન કરે છે, તેમ કહેતા મિતેશ અને તેની માતા શારદાબેન એકદમ ઉશ્કેરાઇ ગયા હતા, અને ગાળો બોલવા લાગ્યા હતા. ગાળો બોલવાની ના પાડતા મિતેશ અને તેની માતાએ દિનેશભાઇ અને તેમના માતા આજુબેનને ઢિકાપાટુનો માર માર્યો હતો. તેમનું ઉપરાણું લઇને શારદાબેનના બીજા બે છોકરા નિલેશ અને અજય પણ ત્યાં દોડી આવ્યા હતા. અને તે લોકોએ પણ આ બન્નેને ઢિકાપાટુનો માર માર્યો હતો. ઉપરાંત મિતેશે આ બન્ને મા દિકરાને માથાના ભાગે લાકડીના સપાટા માર્યા હતા. આ ઘટનામાં ઇજાગ્રસ્ત થયેલ દિનેશ અને તેની માતાને અવિધા ખાતે સારવાર માટે લઇ જવાયા હતા. ત્યારબાદ વધુ સારવાર માટે ભરૂચ સિવિલ હોસ્પિટલ ખાતે લઇ જવાયા હતા. મારામારીના આ બનાવ સંદર્ભે દિનેશભાઇ શાંતિલાલ વસાવા રહે.દુ.માલપોરનાએ શારદાબેન રતિલાલ વસાવા, મિતેશ રતિલાલ વસાવા, નિલેશ રતિલાલ વસાવા અને અજય રતિલાલ વસાવા તમામ રહે.ગામ દુ.માલપોર તા.ઝઘડીયા જિ.ભરૂચના વિરુધ્ધ ઝઘડીયા પોલીસમાં ફરિયાદ લખાવતા પોલીસે ગુનો નોંધી તપાસ હાથ ધરી હતી.
ગુલામહુશેન ખત્રી રાજપારડી જિ.ભરૂચ
