ભરૂચ :
ભરૂચ શહેરના જે.પી. કોલેજના મુખ્ય પ્રવેશદ્વાર સામે બ્રિજ નીચે વાહનચાલકો દ્વારા બેફામ રીતે વાહનો પાર્ક કરવામાં આવતા વિદ્યાર્થીઓને ભારે હાલાકીનો સામનો કરવો પડી રહ્યો છે. કોલેજમાં આવનારા-જવનારા વિદ્યાર્થીઓને પોતાના બાઈક લઈને પસાર થવામાં મુશ્કેલી પડી રહી છે.
બ્રિજ નીચે ચાર અને બે પૈડાંના વાહનો આડેધડ પાર્ક થઈ જતાં રસ્તો સાંકડો બની જાય છે. પરિણામે કોલેજના વિદ્યાર્થીઓ ઉપરાંત સ્થાનિક વાહનચાલકોને પણ અવરજવરમાં તકલીફ વેઠવી પડે છે. ખાસ કરીને કોલેજના શરૂ અને છૂટવાના સમયે ટ્રાફિકની સમસ્યા વધુ ગંભીર બની જાય છે.
વિદ્યાર્થીઓએ માંગ કરી છે કે બ્રિજ નીચે ગેરકાયદે પાર્કિંગ દૂર કરવામાં આવે અને ટ્રાફિક પોલીસ દ્વારા નિયમિત કાર્યવાહી હાથ ધરવામાં આવે, જેથી કોલેજના વિદ્યાર્થીઓ અને અન્ય વાહનચાલકોને અવરજવર માટે સરળતા રહે. સ્થાનિકોમાં પણ આ સમસ્યાના કાયમી નિરાકરણની માંગ ઉઠી રહી છે.
