નડીઆદ અનાથ આશ્રમ રોડ પર ગેરેજ આગળ ગઇકાલે વહેલી સવારે કોઈ નિષ્ઠુર મહિલા પોતાની કુખે જન્મેલ બાળકીને મૂકી ગઈ હતી. આ બનાવ અંગે ગેરેજના માલિકે ૧૦૮ મારફત બાળકીને સારવાર માટે નડીઆદ સિવિલ હોસ્પિટલ લઈ ગયા હતાં. આ અંગે નડિયાદ ટાઉન પોલીસે ગુનો નોંધી વધુ તપાસ હાથ ધરી હતી.
નડિયાદ શહેરમાં હિન્દુ અનાથ આશ્રમ આવેલ છે આ અનાથ આશ્રમ આગળ સોનલ ઓટો મોબાઇલ નામનુ ગેરેજ આવેલ છે. રવિવારે વહેલી સવારે ગેરેજની અંદર ખુલ્લી જગ્યામાં કોઈ નિષ્ઠુર માતા તાજી જન્મેલી બાળકી નગ્ન હાલતમાં મૂકી ગઈ હતી. આ બાળકીનો રડવાનો અવાજ આવતાં ગેરેજમાં રહેતા શેરખાન એ ગેરેજ માલિકને જાણ કરતાં તેઓ તુરંત જ ગેરેજ પર દોડી આવ્યા હતાં. તેમજ સ્થાનિક રહીશો પણ દોડી આવ્યા હતાં. ગેરેજના માલિક કાશીકભાઈ શેખ એ આ બાળકી સતત રડતી હોય તેમજ બેભાન હાલતમાં હોઇ તુરંત જ ૧૦૮ને બોલાવી બાળકીને નડીયાદ સિવિલ હોસ્પિટલ લઈ જવામાં આવી હતી જ્યાં પ્રાથમિક સારવાર કરાવ્યા બાદ આ બાળકીને વધુ સારવાર માટે અમદાવાદ સિવિલ હોસ્પિટલ લઈ જવામાં આવી હતી.આ બાળકી એક દિવસની હોવાનું જણાઈ આવ્યું હતું. આ બનાવની જાણ થતાં નડિયાદ ટાઉન પોલીસ તુરંત જ ઘટના સ્થળે દોડી આવી હતી. આ નવજાત બાળકી કોની હશે અને કોણ મૂકી ગયું તે અંગે જાત જાતની અટકળો થઇ રહી છે. આ બનાવ અંગે કૌશિક ગુલામહૈદર શેખ રહે. જાસ્મીન પાર્ક,ભોજા તલાવડી નડીઆદ એ જાણ કરતાં નડીઆદ ટાઉન પોલીસે ગુનો નોંધી કાયદેસરની કાર્યવાહી હાથ ધરી હતી.
નરેશ ગનવાણી : નડિયાદ
