ભરૂચ જિલ્લાના ઝઘડીયા તાલુકાના ગુમાનપુરા ગામે એક મહિલા પર તેના પતિએ જમવાનું બનાવવાની વાતે ઝઘડો કરી કુહાડી મારતા મહિલા તેમજ તેની પુત્રીને ઇજાઓ થઇ હતી.
ઝઘડીયા પોલીસના જણાવ્યા મુજબ તા.૧૮ મીના રોજ ગુમાનપુરા ગામની ચંપાબેન જયંતીભાઇ વસાવા નામની મહિલા તેના ઘરે રાતના આઠેક વાગ્યાના સમયે જમવાનું બનાવતી હતી, તે દરમિયાન તેના પતિ જયંતીભાઇ છનાભાઇ વસાવાએ ત્યાં આવીને જમવાનું બનાવ્યુ કે કેમ તે બાબતે પુછ્યું હતુ. ત્યારે મહિલાએ શાક બની ગયું છે અને ખીચડી બનાવું છુ, એમ જણાવતા ઉશ્કેરાયેલા જયંતીભાઇએ જમવાનું કેમ નથી બનાવ્યું, એમ કહીને પત્નિને ગાળો દઇને માર માર્યો હતો. ઉપરાંત નજીકમાંથી કુહાડી લઇ આવીને તેને માથા પર કપાળના ભાગે મારી હતી. ચંપાબેનની ૧૫ વર્ષીય પુત્રી પ્રિયંકા છોડાવવા વચ્ચે પડતા તેને પણ માથામાં કપાળના ઉપરના ભાગે મારતા ચામડી ફાટી જઇને લોહી નીકળ્યુ હતું. આ ઘટના બાબતે ચંપાબેન વસાવાની ફરિયાદ મુજબ ઝઘડીયા પોલીસે જયંતીભાઇ છનાભાઇ વસાવા રહે.ગુમાનપુરા તા.ઝઘડીયા જિ.ભરૂચના વિરુધ્ધ ગુનો નોંધી કાયદેસર કાર્યવાહી હાથ ધરી હતી.
ગુલામહુશેન ખત્રી રાજપારડી જિ.ભરૂચ
