કપડવંજ શહેરના ડાકોર રોડ પર આવેલી ગંગોત્રી સોસાયટીમાં દિનેશભાઇ કેશવભાઇ રોહીત રહે છે. તેઓ લાડવેલ ગામે ગ્રામ પંચાયતમાં કોમ્પ્યુટર ઓપરેટર તરીકે ફરજ બજાવે છે. દિનેશભાઈ અને તેમનો પરિવાર રાત્રીના સમયે અગાસી પર સૂઈ ગયા હતા. દરમિયાન તસ્કરો મકાનના મુખ્ય દરવાજાને તાળું તોડી અંદર પ્રવેશ્યા હતા અને રૂમમાં સામાન વેરવિખેર કરી તિજોરીમાં મુકેલા સોના ચાંદીના ઘરેણાં તથા રોકડા રૂપિયા મળી કુલ રૂપિયા 1 લાખ ઉપરાંત મતાની ચોરી કરી ફરાર થઈ ગયા હતા.
બીજા દિવસે વહેલી સવારના દિનેશભાઈના પત્ની અને પુત્ર અગાસી પરથી નીચે આવ્યા હતા. ત્યારે બંને મકાનના દરવાજાએ મારેલા તાળા તૂટેલી હાલતમાં જોતાં તેમને ચોરી થઇ હોવાની ઘટનાની જાણ થઈ હતી. જેથી તેમણે કપડવંજ શહેર પોલીસને જાણ કરી ફરિયાદ આપી છે.
Advertisement
નરેશ ગનવાણી : નડિયાદ
