દહેજમાં જીસીપીએલ કંપનીના ટર્નિંગ પાસેબનેલી ઘટના
ભરૂચ.
નબીપુર હાઇવે પર એકતા પેટ્રોલિયમ પાસે રહેતો અને મુળ યુપીના પ્રયાગરાજનો વતની અફઝલ અઝહરઅલી મોહંમદ ભવાની રોડ વેઝના ટ્રેલર પર ડ્રાઇવર તરીકે કામ કરે છે. તે દહેજની અદાણી કંપનીમાંથી કોલસો ભરેલું ટ્રેલર લઇને મધ્યપ્રદેશના મનાવર ખાતે આવેલાં અલ્ટ્રોટેક કંપનીમાં આપવા જવા માટે નિકળ્યો હતો. તે અદાણી કંપનીમાંથી બહાર નિકળી જીસીપીએલ કંપનીના ટર્નિંગ પાસેથી પસાર થઇ રહ્યો હતો. તે વેળાં જીસીપીએલ કંપની તરફથી એક સફેદ પિકઅપ બોલેરોના ચાલકે પુરઝડપે પોતાની જીપ હંકારી લાવી સ્ટિયરીંગ પરનો કાબુ ગુમાવતાં તેની બોલેરો પિકઅપ તેમના ટ્રેલરના ડિઝલ ટેન્કમાં ભટકાઇ ગઇ હતી. ડિઝલ ટેન્ક ફાટતાં અને સ્પાર્ક થવાને કારણે તેમાં આગ ભભુકી ઉઠતાં આગે બન્ને વાહનોને ચપેટમાં લેતાં બન્ને વાહનો બળીને ખાખ થઇ ગયાં હતાં. સદનશીબે ઘટનામાં કોઇને જાનહાની થઇ ન હતી. બનાવને પગલે તેમણે દહેજ પોલીસ મથકે ફરિયાદ નોંધાવતાં પોલીસે ગુનો નોંધી આગળની કાર્યવાહી હાથ ધરી છે.
