અંકલેશ્વર તાલુકાના ભાદી ગામની સીમ વિસ્તારમાં વનવિભાગ દ્વારા મુકવામાં આવેલા પાંજરામાં એક દીપડો ઝડપાતા સ્થાનિક લોકોમાં રાહતનો માહોલ સર્જાયો છે.
મળતી માહિતી મુજબ છેલ્લા ઘણા સમયથી ભાદી, ખરોડ અને બાકરોલ ગામની સીમ વિસ્તારોમાં દીપડો અવારનવાર નજરે પડતો હતો. જેના કારણે આસપાસના ગામોમાં ભયનું વાતાવરણ ફેલાયું હતું. ખાસ કરીને રાત્રિના સમયે ગ્રામજનોમાં દહેશત વ્યાપી ગઈ હતી. આ અંગે ગ્રામજનોએ વનવિભાગને જાણ કરતા અધિકારીઓ દ્વારા દીપડાને પકડવા માટે વિસ્તારમાં પાંજરું મુકવામાં આવ્યું હતું. જેમાં આખરે દીપડો ફસાઈ જતા તેને ઝડપી લેવામાં આવ્યો હતો. દીપડો ઝડપાતા ભાદી સહિત આસપાસના ગામોના લોકોમાં હાશકારો ફેલાયો છે. વનવિભાગ દ્વારા દીપડાને સુરક્ષિત રીતે કબજે લઈ આગળની કાર્યવાહી હાથ ધરવામાં આવી હોવાનું જાણવા મળ્યું છે.
