ગાંધીનગર જિલ્લાના કડી ખાતેથી મહારાષ્ટ્ર લઈ જવા માટે ભરાયેલ પામોલીન તેલના જથ્થામાં ટેન્કર ચાલકે જ છેતરપીંડી આચરતા 38.45 લાખ રૂપિયાના મુદ્દામાલની હેરાફેરીનો બનાવ સામે આવ્યો છે. આ મામલે અંકલેશ્વર બી ડિવિઝન પોલીસ મથકે ફરિયાદ નોંધાતા પોલીસે તપાસ હાથ ધરી છે.
મળતી માહિતી મુજબ ગાંધીનગરના કડી ખાતેથી પામોલીન તેલ ભરેલું ટેન્કર મહારાષ્ટ્ર જવા માટે નીકળ્યું હતું. ટેન્કરનો ચાલક સાજીદ અલી મોહમ્મદ ફારૂકે રસ્તામાં જ માલ સગેવગે કરી દીધો હતો. બાદમાં તેણે ટેન્કર અંકલેશ્વર નેશનલ હાઇવે ઉપર આવેલ આરામ હોટલના કમ્પાઉન્ડમાં બિનવારસી હાલતમાં ખાલી મૂકીને ત્યાંથી ફરાર થઈ ગયો હતો.
ઘટનાની જાણ થતા માલિક પક્ષે તપાસ કરતા પામોલીન તેલના જથ્થાની 38.45 લાખ રૂપિયાની છેતરપીંડી થયાનું સામે આવ્યું હતું. આ અંગે અંકલેશ્વર બી ડિવિઝન પોલીસ મથકે ફરિયાદ નોંધાવવામાં આવી છે. પોલીસે આરોપી ટેન્કર ચાલક સામે ગુનો નોંધી વધુ તપાસ શરૂ કરી છે.
