ભરૂચ જિલ્લાના અંકલેશ્વર વિસ્તારમાં રહેતી 22 વર્ષીય પરિણીતાએ પતિ, સાસુ-સસરા અને જેઠ સામે દહેજની માંગણી તેમજ શારીરિક અને માનસિક ત્રાસ અંગે ભરૂચ મહિલા પોલીસ મથકે ફરિયાદ નોંધાવી છે. યુવતીએ આક્ષેપ કર્યો છે કે લગ્નના બે-ત્રણ દિવસ બાદથી જ સાસરિયાઓ દ્વારા સતત પૈસાની માંગણી કરવામાં આવતી હતી.
ફરિયાદ મુજબ, લગ્ન મહારાષ્ટ્રમાં કરવા દબાણ કરવામાં આવ્યું હતું અને યુવતીના પિતાએ અલગ અલગ સમયે ઓનલાઈન ટ્રાન્ઝેક્શન તથા ચેક મારફતે કુલ રૂ.8.41 લાખ આપ્યા હતા. ઉપરાંત સાસુએ કરીયાવરનો સામાન તેમજ સોના-ચાંદીના દાગીના પોતાની પાસે લઈ લીધા હોવાનો પણ ઉલ્લેખ કરવામાં આવ્યો છે.
પરિણીતાએ વધુમાં આક્ષેપ કર્યો છે કે પહેરવેશ, નોકરી અને ઘરકામ જેવી બાબતોમાં સતત મેણાં-ટોણાં મારી ગાળો બોલવામાં આવતી હતી તેમજ મારઝૂડ પણ કરવામાં આવતી હતી. પતિ નોકરીએ જતા સમયે ઘરને બહારથી તાળું મારી જતો હતો અને પતિ તરીકેના સંબંધ પણ રાખતો ન હોવાનું ફરિયાદમાં જણાવાયું છે.
મહિલા પોલીસે ફરિયાદના આધારે ગુનો નોંધી વધુ તપાસ હાથ ધરી છે.
