ભરૂચ શહેર નજીક આવેલા વ્યસ્ત ઝાડેશ્વર ચોકડી વિસ્તારમાં એક હાઈવા ટ્રકમાં અચાનક આગ ભભૂકી ઊઠતા વિસ્તારમાં ભારે દોડધામ અને અફરાતફરીનો માહોલ સર્જાયો હતો. ઘટનાના સમયે માર્ગ પર વાહનોની અવરજવર વધુ હોવાના કારણે થોડા સમય માટે ટ્રાફિક વ્યવસ્થા ખોરવાઈ ગઈ હતી.
મળતી માહિતી અનુસાર, હાઈવા ટ્રક રસ્તા પરથી પસાર થઈ રહ્યો હતો ત્યારે અચાનક ટ્રકમાંથી ધુમાડા નીકળવા લાગ્યા હતા અને થોડા જ સમયમાં આગે વિકરાળ સ્વરૂપ ધારણ કર્યું હતું. આગ લાગતા ટ્રક ચાલકે સમયસૂચકતા અને સતર્કતા દાખવી તરત જ વાહન રસ્તાની સાઈડમાં ઉભું રાખી બહાર નીકળી ગયો હતો. જેના કારણે મોટી દુર્ઘટના ટળી હતી અને ચાલકનો આબાદ બચાવ થયો હતો.
ઘટનાની જાણ થતાં આસપાસના લોકો મોટી સંખ્યામાં એકત્ર થઈ ગયા હતા. બીજી તરફ તાત્કાલિક ભરૂચ ફાયર બ્રિગેડને જાણ કરવામાં આવતા ફાયર વિભાગની ટીમ ઘટનાસ્થળે દોડી આવી હતી. ફાયર કર્મચારીઓએ ભારે જહેમત બાદ પાણીનો મારો ચલાવી આગ પર કાબુ મેળવ્યો હતો. આગને કારણે ટ્રકનો આગળનો ભાગ ગંભીર રીતે નુકસાનગ્રસ્ત થયો હોવાનું જાણવા મળ્યું છે.
આગ લાગવાનું ચોક્કસ કારણ હજુ સુધી જાણી શકાયું નથી. પ્રાથમિક અંદાજ મુજબ ટેક્નિકલ ખામી અથવા શોર્ટ સર્કિટના કારણે આગ લાગી હોવાની શક્યતા વ્યક્ત કરવામાં આવી રહી છે. સમગ્ર મામલે વધુ તપાસ હાથ ધરવામાં આવી રહી છે.
ઘટનાના પગલે ઝાડેશ્વર ચોકડી વિસ્તારમાં થોડા સમય માટે ટ્રાફિક જામની સમસ્યા સર્જાઈ હતી. પોલીસે અને સ્થાનિક તંત્રએ ટ્રાફિક નિયંત્રણ માટે કામગીરી હાથ ધરી હતી, જેના બાદ વાહન વ્યવહાર ફરી સામાન્ય બન્યો હતો. સદનસીબે આ ઘટનામાં કોઈ જાનહાનિ થઈ ન હોવાનું જાણવા મળ્યું છે.
