ભરૂચ શહેરના કોલેજ રોડ વિસ્તારમાં આવેલી સરદાર પટેલ સોસાયટીમાં એક અનોખો વન્યજીવ ‘શાહુડી’ (Indian Porcupine) ઘૂસી આવતા સ્થાનિકોમાં આશ્ચર્ય સાથે થોડી ભયની લાગણી ફેલાઈ હતી. જોકે સમયસર સતર્કતા દાખવાતા શાહુડીનું સુરક્ષિત રીતે રેસ્ક્યુ કરવામાં આવ્યું હતું.
મળતી માહિતી અનુસાર, ગઈકાલે સોસાયટીના એક જાગૃત નાગરિકની નજર શાહુડી પર પડતા તેમણે તરત જ નેચર પ્રોટેક્શન ચેરિટેબલ ટ્રસ્ટના જીવદયા પ્રેમી યોગેશ મિસ્ત્રીનો સંપર્ક કર્યો હતો અને સમગ્ર ઘટનાની જાણ કરી હતી.
માહિતી મળતા જ યોગેશ મિસ્ત્રીએ વિલંબ કર્યા વગર વન વિભાગના ઉચ્ચ અધિકારીઓનો સંપર્ક સાધી જરૂરી માર્ગદર્શન મેળવ્યું હતું. ત્યારબાદ વન વિભાગના અધિકારીઓની સૂચના અને માર્ગદર્શન હેઠળ રેસ્ક્યુ ટીમ ઘટના સ્થળે પહોંચી હતી.
ટીમે સાવચેતી અને કુશળતા સાથે ઓપરેશન હાથ ધરી શાહુડીને કોઈપણ પ્રકારની ઇજા પહોંચાડ્યા વગર સુરક્ષિત રીતે કબ્જે લીધી હતી. રેસ્ક્યુ દરમિયાન સોસાયટીના રહેવાસીઓ પણ મોટી સંખ્યામાં એકત્ર થયા હતા અને સમગ્ર ઓપરેશન નિહાળ્યું હતું.
આ ઘટનાએ ફરી એકવાર સાબિત કર્યું છે કે વન્યજીવો રહેણાંક વિસ્તારોમાં દેખાય ત્યારે ગભરાવાની જગ્યાએ તાત્કાલિક નિષ્ણાતો અથવા વન વિભાગને જાણ કરવી જ યોગ્ય પગલું છે. જીવદયા પ્રેમીઓની સતર્કતા અને ઝડપી કામગીરીને સ્થાનિકોએ બિરદાવી હતી.
