ભરૂચ:
રાજસ્થાનના ગંગાનગરમાં 13 વર્ષની બાળકી સાથે થયેલા અમાનવીય કૃત્યના ઘેરા પ્રત્યાઘાત ભરૂચમાં પણ પડ્યા છે. ઘટનાના વિરોધમાં ભરૂચ જિલ્લાની મહિલા સંચાલિત વિવિધ સંસ્થાઓએ દુઃખ અને સંવેદના વ્યક્ત કરી ઘટનાને સખત શબ્દોમાં વખોડી કાઢી હતી.
આ ઘટનાના વિરોધમાં મહિલાઓ દ્વારા ભરૂચના શક્તિનાથ સર્કલથી જિલ્લા કલેક્ટર કચેરી સુધી મૌન રેલી યોજવામાં આવી હતી. રેલીમાં મોટી સંખ્યામાં મહિલાઓ જોડાઈ હતી અને પીડિત બાળકી માટે ન્યાયની માંગ કરી હતી.
મૌન રેલી બાદ મહિલા પ્રતિનિધિઓએ જિલ્લા કલેક્ટરને આવેદનપત્ર પાઠવી ઘટનામાં સંડોવાયેલા દોષિતો સામે કડક કાયદેસરની કાર્યવાહી કરી કડકમાં કડક સજા કરવામાં આવે તેવી માંગ કરી હતી.
મહિલા સંસ્થાઓએ જણાવ્યું હતું કે, બાળકીઓ અને મહિલાઓ સામે બનતી આવી ઘટનાઓ અત્યંત ગંભીર અને ચિંતાજનક છે. આવા ગુનાઓમાં ઝડપી તપાસ અને કડક સજા દ્વારા સમાજમાં દાખલો બેસાડવામાં આવે તે જરૂરી છે.
