નર્મદા જિલ્લા લોકલ ક્રાઈમ બ્રાન્ચ (LCB)એ દારૂની હેરાફેરી સામે મોટી કાર્યવાહી હાથ ધરી દેડીયાપાડા તાલુકાના નિવાલ્દા ખાતે નાયરા પેટ્રોલ પંપ નજીકથી અંદાજે ₹79,46,984ના મુદ્દામાલ સાથે વિદેશી દારૂનો જથ્થો ઝડપી પાડ્યો છે. આ કાર્યવાહી દરમિયાન એક આરોપીની ધરપકડ કરવામાં આવી છે, જ્યારે અન્ય એક આરોપીને વોન્ટેડ જાહેર કરવામાં આવ્યો છે.
પોલીસને મળેલી બાતમીના આધારે મહારાષ્ટ્ર તરફથી ઘનશેરા ચેક પોસ્ટ મારફતે આવી રહેલા ટાટા આયશર કન્ટેનર (MH-04-JK-9319)ને રોકી તપાસ હાથ ધરવામાં આવી હતી. તપાસ દરમિયાન કન્ટેનરમાંથી 180 મિલી ક્ષમતાની Royal Blue Malt Whiskyની કુલ 33,552 બોટલો મળી આવી હતી.
પોલીસે ₹64,41,984 કિંમતનો વિદેશી દારૂ, ₹15,00,000 કિંમતનું કન્ટેનર, ₹5,000 કિંમતનો મોબાઇલ ફોન સહિત કુલ ₹79,46,984નો મુદ્દામાલ જપ્ત કર્યો છે.
આ કેસમાં પોલીસે ઓમપ્રકાશ ભાખરારામ બિસ્નોઈ (ઉ.વ. 22, રહે. ઘનોડા, તા. રામસર, જી. બાડમેર, રાજસ્થાન)ની ધરપકડ કરી છે. જ્યારે મહાદેવ રાજપૂતને વોન્ટેડ જાહેર કરીને તેની શોધખોળ શરૂ કરવામાં આવી છે.
આ સમગ્ર કાર્યવાહી નર્મદા જિલ્લા LCBની ટીમે ઉચ્ચ અધિકારીઓના માર્ગદર્શન હેઠળ સફળતાપૂર્વક પાર પાડી હતી. પોલીસે ગુનો નોંધી આગળની કાયદેસરની કાર્યવાહી હાથ ધરી છે.
