સુરત ગ્રામ્ય એલસીબીએ નશામુક્ત ગુજરાત અભિયાન અંતર્ગત મોટી સફળતા મેળવી આંતરરાજ્ય નાર્કોટિક્સ નેટવર્કનો પર્દાફાશ કર્યો છે. પોલીસે મુંબઈ-દિલ્હી નેશનલ હાઈવે પર ટ્રકમાં **RICE CRACKERS (ચોખાની પાપડી)**ની આડમાં છુપાવી હેરાફેરી કરવામાં આવી રહેલા 2,502.775 કિલોગ્રામ પ્રતિબંધિત પોસડોડાના જથ્થા સાથે કુલ ₹4.04 કરોડથી વધુનો મુદ્દામાલ જપ્ત કર્યો છે.
પોલીસને મળેલી ચોક્કસ બાતમીના આધારે એલસીબી અને પેરોલ ફરો સ્ક્વોડે ડિંડોલી વિસ્તાર નજીક મુંબઈ-દિલ્હી નેશનલ એક્સપ્રેસ-4 પર ટ્રક નંબર RJ-54-GA-1550ને રોકી તપાસ હાથ ધરી હતી. તપાસ દરમિયાન ટ્રકમાં ચોખાની પાપડીની બેગોની નીચે પ્રતિબંધિત પોસડોડાનો જથ્થો મળી આવ્યો હતો. ત્યારબાદ એનડીપીએસ એક્ટ હેઠળ કાયદેસરની કાર્યવાહી કરી ટ્રકના ચાલક **સુનિલ ભવરલાલ બિશ્નોઈ (રાજસ્થાન)**ની ધરપકડ કરવામાં આવી હતી.
તપાસમાં સામે આવ્યું છે કે આરોપી મધ્યપ્રદેશના રતલામથી પોસડોડાનો જથ્થો ટ્રકમાં ભરી રાજસ્થાન લઈ જઈ રહ્યો હતો. ટ્રાન્સપોર્ટ દરમિયાન શંકા ન જાય તે માટે પોસડોડાને RICE CRACKERSની બેગોની આડમાં છુપાવવામાં આવ્યો હતો. પોલીસે મુખ્ય સપ્લાયર સહિત અન્ય વોન્ટેડ આરોપીઓની શોધખોળ શરૂ કરી છે.
આ કાર્યવાહીમાં પોલીસે 2,502.775 કિલોગ્રામ પોસડોડા, ટ્રક, રોકડ, મોબાઈલ ફોન અને 150 બેગ RICE CRACKERS સહિત કુલ ₹4,04,28,825નો મુદ્દામાલ કબજે કર્યો છે. પ્રાથમિક તપાસ મુજબ આરોપીને આ જથ્થો પહોંચાડવા બદલ ₹70 હજાર મળવાના હોવાનું પણ સામે આવ્યું છે.
