દિવાળી અને નૂતન વર્ષના તહેવારોમાં વતન તરફ જતા મુસાફરોની વધતી ભીડને ધ્યાનમાં રાખીને ભરૂચ એસટી ડિવિઝન દ્વારા વિશેષ આયોજન કરવામાં આવ્યું છે. મુસાફરોને બસની અછતને કારણે હાલાકી ન ભોગવવી પડે તે માટે દરરોજ અંદાજે 50 વધારાની બસો દોડાવવાનો નિર્ણય લેવામાં આવ્યો છે.
અગિયારસથી શરૂ થતા તહેવારો દરમિયાન મુસાફરોના વધારાના ધસારાને પહોંચી વળવા આગામી 7 નવેમ્બર સુધી રોજ વિશેષ બસોનું સંચાલન કરાશે. આ બસો ભરૂચના ભોલાવ બસ સ્ટેન્ડ, જીએનએફસી બસ સ્ટેન્ડ તેમજ અંકલેશ્વર હાઇવે બસ સ્ટેન્ડ પરથી દોડાવવામાં આવશે.
ખાસ કરીને ભરૂચ અને અંકલેશ્વરના ઔદ્યોગિક વિસ્તારોમાં કામ કરતા સૌરાષ્ટ્રના રત્નકલાકારો તેમજ દાહોદ-ગોધરા પંથકના શ્રમિકો દિવાળીના તહેવારોમાં પોતાના વતન જતા હોય છે. આ મુસાફરોને સુરક્ષિત અને સરળતાથી વતન પહોંચાડી શકાય તે માટે એસટી વિભાગ દ્વારા વિવિધ રૂટનું ખાસ ટાઇમટેબલ તૈયાર કરવામાં આવ્યું છે.
તહેવારો દરમિયાન ખાનગી લક્ઝરી બસ સંચાલકો દ્વારા ઊંચા ભાડાં વસૂલવામાં આવતાં હોવાની ફરિયાદો વચ્ચે એસટી નિગમ દ્વારા વધારાની બસોનું આયોજન મુસાફરો માટે રાહતરૂપ બનશે. સરકારી બસ સેવાનો લાભ લઈને મુસાફરો આરામદાયક અને સસ્તી મુસાફરી કરી શકે તે માટે એસટી વિભાગ દ્વારા વધુમાં વધુ નાગરિકોને આ વિશેષ બસ સેવાનો લાભ લેવા અનુરોધ કરવામાં આવ્યો છે.
