ભરૂચ :
ભરૂચ રેલવે સ્ટેશન પરિસરમાં આવેલી ડો. બાબાસાહેબ આંબેડકરની પ્રતિમા ખાતે અશોક વિજયાદશમી અને ધમ્મચક્ર પ્રવર્તન દિવસની ઉજવણી કરવામાં આવી હતી. આ પ્રસંગે વિવિધ સામાજિક સંગઠનોના આગેવાનો અને કાર્યકરો એકત્રિત થયા હતા. તેમણે બાબાસાહેબની પ્રતિમાને પુષ્પહાર અર્પણ કરી શ્રદ્ધાંજલિ આપી હતી. ત્યારબાદ બુદ્ધ વંદના કરવામાં આવી હતી અને ભારતીય બંધારણની પ્રસ્તાવનાનું સામૂહિક પઠન કરી સમાનતા, ન્યાય, સ્વતંત્રતા અને બંધુત્વના મૂલ્યોને જીવનમાં ઉતારવાનો સંકલ્પ લેવામાં આવ્યો હતો.
ડો. બાબાસાહેબ આંબેડકરે 14 ઓક્ટોબર, 1956ના રોજ નાગપુરની ઐતિહાસિક દીક્ષાભૂમિ ખાતે લાખો અનુયાયીઓ સાથે બૌદ્ધ ધર્મની દીક્ષા ગ્રહણ કરી હતી. આ ઐતિહાસિક ઘટનાની સ્મૃતિમાં દર વર્ષે ધમ્મચક્ર પ્રવર્તન દિવસની ઉજવણી કરવામાં આવે છે. બુદ્ધિસ્ટ સંશોધન કેન્દ્રના આહ્વાનથી દેશભરમાં યોજાયેલા જનજાગૃતિ કાર્યક્રમોના ભાગરૂપે ભરૂચમાં પણ આ કાર્યક્રમનું આયોજન કરવામાં આવ્યું હતું.
કાર્યક્રમમાં ઈન્સાફ સંગઠનના રાષ્ટ્રીય અધ્યક્ષ મોહન પરમાર, બામસેફ ગુજરાતના મહાસચિવ શાંતિલાલ રાઠોડ, બામસેફના પૂર્વ રાષ્ટ્રીય અધ્યક્ષ બેચર રાઠોડ તેમજ ભારત રાષ્ટ્ર મહિલા ગૃહ ઉદ્યોગના રાષ્ટ્રીય અધ્યક્ષ જે.વી. પરમાર ઉપસ્થિત રહ્યા હતા.
આ ઉપરાંત જયંતિ સુતરિયા, અશોક માંડવીયા, વિનય સોલંકી, વિઠ્ઠલ પરમાર, અશોક મકવાણા, રમણ પરમાર, બાબુ પરમાર, મંજુબેન પરમાર અને શ્યામજી મકવાણા સહિતના આગેવાનો, હોદ્દેદારો અને કાર્યકરોએ હાજરી આપી હતી.
આ પ્રસંગે ડો. બાબાસાહેબ આંબેડકરના વિચારો અને બંધારણીય આદર્શોને જનજન સુધી પહોંચાડવા તેમજ સમાજમાં સમાનતા, ન્યાય અને ભાઈચારાની ભાવનાને મજબૂત બનાવવાનો સંદેશ આપવામાં આવ્યો હતો.
