ભરૂચ: દિવાળીના તહેવારમાં પ્રદૂષણ નિયંત્રણ અને જાહેર સલામતીને ધ્યાનમાં રાખીને ભરૂચ જિલ્લામાં ફટાકડાના ઉપયોગ અને ખરીદ-વેચાણ પર કડક નિયંત્રણો મૂકવામાં આવ્યા છે. સુપ્રીમ કોર્ટની ગાઇડલાઇન મુજબ અધિક જિલ્લા મેજિસ્ટ્રેટના આદેશથી દિવાળીના દિવસે રાત્રે 8થી 10 વાગ્યા સુધી એટલે કે માત્ર બે કલાક જ ફટાકડા ફોડવાની મંજૂરી આપવામાં આવી છે.
વધુ ધુમાડો અને અવાજ કરતા ફટાકડા, ઝેરી બેરિયમયુક્ત ફટાકડા તથા વિદેશી ફટાકડા રાખવા, વેચવા અને ફોડવા પર પ્રતિબંધ રહેશે. ઇ-કોમર્સ વેબસાઇટ દ્વારા ફટાકડાનું ઓનલાઇન વેચાણ અને ઓર્ડર પર ખરીદી કરવા પર પણ રોક લગાવવામાં આવી છે. સ્કાય લેન્ટર્ન અને ચાઇનીઝ તુક્કલ ઉડાડવા પર પ્રતિબંધ રહેશે.
હોસ્પિટલ, દવાખાના, શાળા અને અદાલતથી 100 મીટરનો વિસ્તાર સાયલન્સ ઝોન રહેશે. બજારો, સાંકડી ગલીઓ, પેટ્રોલ પંપ અને ગેસ બોટલિંગ પ્લાન્ટ નજીક ફટાકડા ફોડી શકાશે નહીં. માત્ર PESO-માન્ય ગ્રીન ફટાકડા જ વેચી શકાશે. નિયમોનો ભંગ કરનાર સામે ભારતીય ન્યાય સંહિતા, 2023ની કલમ 223 હેઠળ કાર્યવાહી કરવામાં આવશે.
