ભરૂચ :
ટ્રેનમાં મુસાફરી દરમિયાન મોબાઈલ ફોન પર ઊંચા અવાજે ગીતો વગાડવા, વીડિયો જોવા અથવા સ્પીકર મોડ પર વાતચીત કરીને અન્ય મુસાફરોને પરેશાન કરનારાઓએ હવે સાવચેત રહેવાની જરૂર છે. પશ્ચિમ રેલવેના વડોદરા મંડળ દ્વારા મંડળ હેઠળનાં રેલવે સ્ટેશનો પર મુસાફરોને મોબાઈલ ફોન અને ઓડિયો ડિવાઇસનો વિવેકપૂર્ણ ઉપયોગ કરવા અંગે જાગૃત કરવામાં આવી રહ્યા છે. સહપ્રવાસીઓની શાંતિ અને આરામમાં ખલેલ પહોંચાડનાર સામે રેલવે અધિનિયમની કલમ 145 હેઠળ કાર્યવાહી થઈ શકે છે. રેલવે દ્વારા જણાવ્યા મુજબ, આવા કિસ્સામાં ₹1,000 સુધીના દંડની જોગવાઈ લાગુ પડી શકે છે.
વડોદરા મંડળની ટીમોએ રેલવે સ્ટેશનો પર મુસાફરોને સમજાવ્યું હતું કે ટ્રેનમાં મુસાફરી દરમિયાન તેમજ રેલવે પરિસરમાં મોબાઈલ ફોન પર સ્પીકર મોડમાં ગીતો વગાડવા અને વીડિયો ચલાવવાનું ટાળવું જોઈએ. તેના બદલે ઈયરફોન અથવા હેડફોનનો ઉપયોગ કરવો જોઈએ. ઉપરાંત, મોબાઈલ ફોન પર ઊંચા અવાજે વાતચીત ન કરવા પણ અપીલ કરવામાં આવી છે, જેથી અન્ય મુસાફરોને અસુવિધા ન થાય.
રેલવેના જણાવ્યા અનુસાર, ટ્રેનમાં અથવા રેલવે પરિસરમાં ઊંચા અવાજે સંગીત વગાડવું, વીડિયો ચલાવવો કે મોટેથી વાતચીત કરીને સહપ્રવાસીઓને પરેશાન કરવું ઉપદ્રવની શ્રેણીમાં આવી શકે છે. આવા કિસ્સામાં રેલવે અધિનિયમની કલમ 145ની લાગુ જોગવાઈઓ હેઠળ કાર્યવાહી થઈ શકે છે. અધિકૃત રેલવે કર્મચારી દ્વારા મનાઈ કરવામાં આવ્યા બાદ પણ મુસાફર આવું વર્તન ચાલુ રાખે તો કાયદા મુજબ વધુ કાર્યવાહી પણ થઈ શકે છે.
રેલવે તંત્રએ મુસાફરોને જાહેર સ્થળોએ શિસ્ત જાળવવા અને અન્ય મુસાફરોની સુવિધાનું ધ્યાન રાખવા અપીલ કરી છે. ટ્રેનમાં દરેક મુસાફરની મુસાફરી સુખદ અને શાંતિપૂર્ણ રહે તે માટે મોબાઈલ ફોનનો ઉપયોગ જવાબદારીપૂર્વક કરવો જરૂરી છે.
