અંકલેશ્વર :
અંકલેશ્વરના સ્ટેશન રોડ પર આવેલી હોટલ રુચિના કિચનમાં આગ લાગવાની ઘટના સામે આવી હતી. કિચનમાં અચાનક આગ ભભૂકી ઊઠતાં હોટલના સ્ટાફ સહિત આસપાસના લોકોમાં અફરાતફરી અને દોડધામ મચી ગઈ હતી. ઘટનાની જાણ થતાં જ અંકલેશ્વર નગરપાલિકાની ફાયર ટીમ તાત્કાલિક સ્થળ પર દોડી ગઈ હતી અને આગ પર કાબૂ મેળવવાની કામગીરી હાથ ધરી હતી.
પ્રાપ્ત માહિતી મુજબ, હોટલના કિચનમાં આગ લાગતાં ધુમાડા સાથે આગની જ્વાળાઓ ફેલાવા લાગી હતી. આથી હોટલમાં હાજર સ્ટાફ અને આસપાસના લોકોમાં ચિંતાનો માહોલ સર્જાયો હતો. બનાવ અંગે ફાયર વિભાગને જાણ કરવામાં આવતાં ફાયર ફાઇટરો તાત્કાલિક ઘટનાસ્થળે પહોંચી ગયા હતા.
ફાયર વિભાગ દ્વારા આગ બુઝાવવાની કામગીરી શરૂ કરતાં પહેલાં સુરક્ષાના ભાગરૂપે હોટલની ગેસ લાઇન અને વીજ કનેક્શન બંધ કરવામાં આવ્યાં હતાં. ત્યારબાદ ફાયર ફાઇટરોએ પાણીનો મારો ચલાવી આગને વધુ ફેલાતી અટકાવી હતી અને ભારે જહેમત બાદ આગ પર કાબૂ મેળવ્યો હતો.
પ્રાથમિક અનુમાન મુજબ, કિચનમાં શોર્ટ સર્કિટના કારણે આગ લાગી હોવાની આશંકા વ્યક્ત કરવામાં આવી રહી છે. જોકે, આગ લાગવાનું ચોક્કસ કારણ તપાસ બાદ જ સ્પષ્ટ થશે. ફાયર ટીમની સમયસરની કામગીરીના પગલે આગ પર કાબૂ મેળવવામાં આવ્યો હતો. આ ઘટનાને પગલે સ્ટેશન રોડ વિસ્તારમાં થોડા સમય માટે દોડધામનો માહોલ સર્જાયો હતો.
