ભરૂચમાં CNGના ભાવમાં સતત વધારાને પગલે રિક્ષાચાલકોની આર્થિક મુશ્કેલીઓમાં વધારો થયો છે. અદાણી CNGનો ભાવ રૂ.100ને પાર પહોંચતાં રિક્ષા ચલાવીને પરિવારનું ગુજરાન ચલાવતા ચાલકોના બજેટ ખોરવાઈ ગયાં છે. બીજી તરફ, ગુજરાત ગેસના ભાવમાં પણ વધારો થવાની આશંકાને પગલે રિક્ષાચાલકોમાં ચિંતા જોવા મળી રહી છે.
રિક્ષાચાલકોના જણાવ્યા મુજબ, રિક્ષા ચલાવીને થતી રોજિંદી આવકનો મોટો હિસ્સો હવે CNG ભરાવવામાં જ ખર્ચાઈ જાય છે. પરિણામે દિવસભરની મહેનત બાદ પણ પૂરતી બચત થતી નથી. રિક્ષાના માસિક હપ્તા ભરવા ઉપરાંત પરિવારની રોજિંદી જરૂરિયાતો પૂરી કરવામાં પણ મુશ્કેલી પડી રહી છે.
ચાલકોએ વધુમાં જણાવ્યું હતું કે, એક તરફ જીવનજરૂરિયાતની ચીજવસ્તુઓના ભાવમાં વધારો થઈ રહ્યો છે, તો બીજી તરફ CNGનો ખર્ચ પણ સતત વધી રહ્યો છે. અગાઉ રિક્ષા ચલાવીને થોડી ઘણી બચત થતી હતી, પરંતુ હવે ગેસના વધતા ખર્ચને કારણે બચત ઘટી ગઈ છે.
રિક્ષા વ્યવસાય પર નિર્ભર અનેક પરિવારો માટે આ સ્થિતિ આર્થિક બોજ સમાન બની છે. ત્યારે CNGના ભાવ પર નિયંત્રણ લાવી રિક્ષાચાલકોને રાહત આપવામાં આવે તેવી માંગ સરકાર સમક્ષ ઉઠી છે.
