રાજપારડી ઝઘડીયા વચ્ચે સિમધરા ગામ નજીક ગઇ રાત્રીએ સર્જાયેલા અકસ્માતમાં એક ઇસમનું સ્થળ પરજ કરુણ મોત નિપજ્યુ હતુ, જ્યારે અન્ય એકને ઇજાઓ થઇ હતી.રાજપારડી પોલીસમાંથી મળતી વિગતો મુજબ રાત્રીના દોઢેક વાગ્યાના અરસામાં રાજપારડી તરફ જતી એક ટ્રકનો જોઇન્ટ તુટી જતા ચાલકે ટ્રક માલિકને આ અંગે જાણ કરતા બાદમાં ગાડીના રિપેરિંગ માટે મિકેનિકને મોકલ્યો હતો.દરમિયાન પાછળથી આવતી એક હાઇવા ટ્રકના ચાલકે પોતાનું વાહન આ બગડેલી ટ્રક સાથે અથાડી દેતા મિકેનિક કાદરભાઇ ગુલામભાઇ શેખ શરીર પર ગંભીર રીતે ઘવાયા હતા.આ અકસ્માતમાં ગંભીર રીતે ઘવાયેલા કાદરભાઇ શેખનું ઘટના સ્થળેજ કરુણ મોત નિપજ્યુ હતુ. જ્યારે સજ્જાદઅલી શેખ નામના ઇસમને શરીર પર મુઢ માર વાગતા તે ઇજાગ્રસ્ત થયો હતો.આ અંગે યાસીનહુશેન મહંમદ શેખ રહે.નવી તરસાલી તા.ઝઘડીયા જિ.ભરૂચનાએ રાજપારડી પોલીસમાં ફરિયાદ લખાવતા પોલીસે ગુનો નોંધી તપાસ હાથ ધરી હતી.લાંબા સમયથી આ ધોરીમાર્ગ તેના પર અવારનવાર થતા અકસ્માતોને લઇને જનતાને ચિંતિત બનાવી રહ્યો છે.બેફામ દોડતા વાહનો અવારનવાર જીવલેણ અકસ્માતો સર્જતા હોવા છતા આવા વાહનોની બેફામ દોડ પર અંકુશ મુકવા તંત્ર કોઇ અસરકારક ભૂમિકા અપનાવતુ નથી, એવી વ્યાપક લોક ફરિયાદો ઉઠી રહીછે.ત્યારે તંત્ર તાકીદે એકશનમાં આવી ઘટતા પગલા ભરે તે અનિવાર્ય બન્યુ છે.
ગુલામહુશેન ખત્રી રાજપારડી જિ.ભરૂચ.
