ભરૂચ શહેરનાં સ્ટેશન રોડ પર આવેલ હોટલ પ્લાઝા પાસે ગેસ લાઈનમાં આચનક લીકેજ બાદ ભીષણ આગ ફાટી નીકળતા ભારે અફરાતફરીનો માહોલ સર્જાયો હતો, આગની જ્વાળાઓ અચાનક ઉંચે સુધી પહોંચતા સ્થાનિકોનાં જીવ એક સમયે તાળવે ચોટયા હતા, જોત જોતામાં આગ વિકરાળ બનતા સ્થાનિકોએ ભરૂચ નગરપાલીકાનાં ફાયર વિભાગમાં જાણ કરી હતી.
ફાયરનાં લશ્કરોએ તાત્કાલિક ઘટના સ્થળે દોડી જઇ આગ ઉપર પાણીનો મારો ચલાવી આગ પર તાત્કાલિક કાબુ મેળવવાની તજવીજ હાથધરી ગેસ લાઈનનો વાલ્વ બંધ કરી પરિસ્થિતિ ઉપર કાબુ મેળવ્યો હતો. મહત્વનું છે કે જે સ્થળે ગેસ લાઈનમાં આગ લાગી તેનાથી માત્ર 100 ફૂટની દૂરી પર પેટ્રોલ પંપ હોય લોકોમાં આગની જ્વાળાઓ જોઈ જીવ અધ્ધર થયા હતા પરંતુ તાત્કાલિક આગ કાબુમાં આવી જતા લોકોએ હાશકારો અનુભવ્યો હતો.
Advertisement
