વિનોદભાઈ પટેલ
હાલ અંકલેશ્વર શહેરમાં દિન-પ્રતિદિન ચોરીના બનાવો વધી રહ્યા છે ત્યારે ખાસ કરીને અંકલેશ્વર શહેરમાં મોબાઈલ ચોરોનો આતંક વધી રહ્યો છે. બે દિવસ પહેલાં જ અંકલેશ્વરની ડીસન્ટ હોટલ નજીકથી પણ એક વ્યક્તિનો મોબાઇલ ચોરાયો હતો.જેમાં ચોર પલ્સર ગાડી લઈને એક વ્યક્તિનો મોબાઇલ ખેંચી ફરાર થઈ ગયો હતો. તેને લઈને અંકલેશ્વર શહેર પોલીસે વોચ ગોઠવી હતી. જેમાં અંકલેશ્વર પ્રતિન ચોકડી વિસ્તારમાં અંકલેશ્વર પી.એસ.આઈ જે.પી.ચૌહાણ અને પ્રદીપ ભાઈ દ્વારા એક અજાણ્યા યુવકને નંબર પ્લેટ વગરની પલ્સર ગાડી રોકી પૂછપરછ કરતા યુવકે તેનું નામ રાશિદખાન જણાવ્યું હતું અને તે સુરતનો હોવાનું જણાવ્યું હતું.યુવાનની તપાસ કરતા યુવાન પાસેથી વગર બિલના આઠ જેટલા મોબાઇલ તથા એક વગર કાગળની પલ્સર ગાડી મળી આવતા અંકલેશ્વર શહેર પોલીસ ના પી.એસ.આઈ જે.પી.ચૌહાણ અને તેમની ટીમે યુવાનની અટકાયત કરી વધુ તપાસ હાથ ધરી હતી. હાલ આ યુવાનના રિમાન્ડ મંજુર કરી આ મોબાઈલ તથા ગાડી ક્યાંથી લાવ્યો હોય અને તેની સાથે કેટલા અન્ય વ્યક્તિ આ કામમાં જોડાયેલા હોય તેવી પૂછપરછ અંકલેશ્વર શહેર પોલીસ ચલાવી રહી છે.
