અંકલેશ્વર તાલુકાના ભડકોદ્રા ગામ નજીક આવેલ પોલીસ ચોકી પાસે એક દુકાનમાં તસ્કરો દ્વારા ચોરીનો નિષ્ફળ પ્રયાસ કરવામાં આવ્યો હતો, અજાણ્યા બે જેટલા તસ્કરોએ દુકાન પાસે આવી દુકાનના શટરને તોડવાનો નિષ્ફળ પ્રયાસ કર્યો હતો, જેમાં તેઓ સફળ ન થતા આખરે તેઓએ સ્થળ છોડી ભાગી જવું પડ્યુ હતું.
ચોરીની સમગ્ર ઘટના સીસીટીવીમાં કેદ થતા મામલા અંગે દુકાનના સંચાલક દ્વારા પોલીસ વિભાગને જાણ કરવામાં આવતા પોલીસે ઘટના સ્થળે દોડી જઈ સીસીટીવી ફૂટેજની મદદથી અજાણ્યા તસ્કરોને ઝડપી પાડવા માટેના ચક્રો ગતિમાન કર્યા હતા.
અત્રે ઉલ્લેખનીય છે કે ભરૂચ જિલ્લામાં અનેક સ્થળે છેલ્લા કેટલાય દિવસોથી ચોરીના બનાવોમાં નોંધપાત્ર વધારો જોવા મળતા પોલીસ વિભાગની પેટ્રોલીંગ સામે પણ સવાલો ઉભા થયા છે, ત્યારે રાત્રીના સમયે પોલીસ વિભાગ ચુસ્ત પેટ્રોલિંગ કરે અને અજાણ્યા શંકાસ્પદ લોકોની કડક પૂછપરછ કરે તો આખી તસ્કર ગેંગનું પગેરું મળી શકે તેવી ચર્ચાઓ આ પ્રકારના ચોરીના વધતા બનાવો બાદથી લોકોમાં ચર્ચાનું કેન્દ્ર બની છે.
