ભરૂચ જિલ્લામાં ચાલુ વર્ષે આગ લાગવાની અનેકો ઘટનાઓ સામે આવી છે, જિલ્લામાં ખાસ કરી અંકલેશ્વર પંથકમાં આગ લાગવાના બનાવોમાં વધારો જોવા મળ્યો છે, તેવામાં વધુ એકવાર વીતેલા 24 કલાકમાં જ આગ લાગવાની ત્રીજી ઘટના સામે આવી હતી.
અંકલેશ્વર વાલિયા રોડ પર આવેલ રવિરત્ન મોટર્સના વર્ક શોપમાં અચાનક આગ ભભુકી ઉઠી હતી, આગ લાગવાની ઘટનાના પગલે આસપાસ ઉપસ્થિત લોકોમાં દોડધામ મચી હતી, આગની ઘટનામાં શો રૂમમાં રહેલ બે જેટલી કાર આગની ઝપેટમાં આવી જતા બળીને ખાખ થઈ ગઈ હતી, તેમજ અંદર રહેલા પક્ષીઓ પણ આગની ઝપેટમાં આવતા ઈજાગ્રસ્ત થયા હતા.
અચાનક લાગેલ આગ લાગવાની ઘટના અંગેની જાણ અંકલેશ્વર ફાયર વિભાગમાં કરવામાં આવતા ફાયરના કર્મીઓએ લાયબંબા સાથે તાત્કાલિક સ્થળ ઉપર દોડી જઈ પાણીનો મારો ચલાવી આગને ગણતરીના સમયમાં કાબુમાં લીધી હતી, ઘટનામાં સદનસીબે કોઈ જાનહાની થવા પામી ન હતી જોકે શો રૂમને નુકશાની થવા પામી હતી.
