સમાજ માટે લગ્ન પરિચય મેળાનું આયોજન કરાયું
ભરૂચ.
સંત શિરોમણી ગુરુ શ્રી રોહિદાસ મહારાજની 649મી જન્મજયંતી નિમિત્તે ભરૂચ શહેરમાં ભવ્ય જન્મજયંતી મહોત્સવનું આયોજન કરવામાં આવ્યું હતું. આ સાથે રોહિદાસવંશીય સમાજના યુવક-યુવતીઓ માટે લગ્નોત્સવ અંતર્ગત પરિચય અને પસંદગી મેળાનું પણ સફળ આયોજન કરવામાં આવ્યું હતું.
આ કાર્યક્રમ શહેરના ડૉ. બાબાસાહેબ આંબેડકર ભવન હોલ, કલેક્ટર કચેરી નજીક યોજાયો હતો, જેનું સમગ્ર આયોજન શ્રી ગુરુ રૈદાસ જન્મોત્સવ સમિતિ, ભરૂચ દ્વારા કરવામાં આવ્યું હતું. કાર્યક્રમ દરમિયાન સંત રોહિદાસ મહારાજના જીવન, તેમના વિચારધારા અને સમાજ સુધારણામાં આપેલા યોગદાન પર પ્રકાશ પાડવામાં આવ્યો હતો.
લગ્ન પરિચય મેળામાં સમાજના યુવક-યુવતીઓને યોગ્ય જીવનસાથી શોધવા માટે એક સુવ્યવસ્થિત અને સુમેળભર્યો મંચ પૂરો પાડવામાં આવ્યો હતો. આ મેળામાં ભાગ લેનાર પરિવારો અને યુવાનોમાં વિશેષ ઉત્સાહ જોવા મળ્યો હતો.
આ પ્રસંગે રોહિદાસવંશીય સમાજના અનેક આગેવાનો, યુવક-યુવતીઓ તેમજ મોટી સંખ્યામાં સમાજના લોકો ઉપસ્થિત રહ્યા હતા. સમગ્ર કાર્યક્રમ ભક્તિભાવ, સામાજિક એકતા અને ઉત્સાહપૂર્ણ વાતાવરણમાં સફળતાપૂર્વક સંપન્ન થયો હતો.
