એલસીબીની ટીમે આરોપીને પકડી લાવી એ ડિવિઝન પોલીસને સોંપ્યો
ભરૂચ.
ભરૂચ લોકલ ક્રાઈમ બ્રાન્ચના પીઆઈ એમ. પી. વાળાએ તેમની ટીમને જિલ્લાના નાસતા ફરતા આરોપીઓની યાદીમાં સામેલ આરોપીઓને ઝડપી પાડવા માટે અલગ અલગ ટીમો બનાવી છે. ત્યારે તે ટીમો દ્વારા હ્યુમન ઈન્ટેલિજન્સ અને ટેક્નિકલ સર્વેલન્સની મદદથી આરોપીઓને શોધવાની કવાયત હાથ ધરાઈ છે. હ્યુમન ઈન્ટેલિજન્સ અને ટેક્નિકલ સર્વેલન્સમાંથી મળેલાં ઈનપુટના આધારે આરોપીઓના સગડ મેળવાઈ રહ્યાં છે.
દરમિયાનમાં ભરૂચ એ ડિવિઝન પોલીસ સ્ટેશનના વર્ષ ૨૦૦૬માં નોંધાયેલાં ઘરફોડ ચોરીના કેસમાં મધ્યપ્રદેશના દેવાસ જિલ્લામાં આવેલાં કશોડ ખાતે રહેતો ગુરૂચરણસિંહ રૂપસિંહ પટવાનો નામનો શખ્સ ફરાર હતો. પોલીસે જે તે સમયે તેને શોધવાના તમામ પ્રયાસ કર્યા હતાં. જોકે, તે અલગ અલગ સ્થળે સંતાઈને રહેતો હતો. દરમિયાનમાં તે તેના કરોડ તાલુકાના કાલાપાટા ગામ ખાતે આવેલો હોવાની ચોક્કસ બાતમી એલસીબીની ટીમને મળતાં તેમણે તમામ પ્રકારની ખરાઈ કરી એક ટીમને મધ્યપ્રદેશ મોકલી હતી. જ્યાં ટીમે વોચ ગોઠવી તમામ માહિતી એકત્ર કર્યા બાદ તેની પરપકડ કરી હતી. ટીચે તેને ભરૂચ લાવી એ ડિવિઝનપોલીસ મથકે સોંપતાં પોલીસે તેનો કબજો મેળવી આગળની કાર્યવાહી હાથ ધરી છે.
