વાલિયા તાલુકાના વટારીયા સ્થિત UPL યુનિવર્સિટીના શ્રોફ એસ.આર. રોટરી ઇન્સ્ટિટ્યૂટ ઓફ કેમિકલ ટેકનોલોજીમાં ગેરવહીવટનો ચોંકાવનારો મામલો સામે આવ્યો છે. મળતી માહિતી મુજબ, અમદાવાદના ચાંદખેડા વિસ્તારમાં રહેતા રીતેશ ઠક્કરને ફેબ્રુઆરી 2024થી એડમિનિસ્ટ્રેટિવ ઓફિસર તરીકે નિમણૂક આપવામાં આવી હતી.
આરોપ છે કે, રીતેશ ઠક્કરે ગત 25 સપ્ટેમ્બર 2025થી યુનિવર્સિટીમાં ફરજ પર આવવાનું બંધ કરી દીધું હતું. ત્યારબાદ રજિસ્ટ્રારે ફી બાકી ધરાવતા વિદ્યાર્થીઓને જાણ કરતા સમગ્ર મામલો બહાર આવ્યો હતો.
તપાસમાં સામે આવ્યું કે, આરોપીએ 7 વિદ્યાર્થીઓ પાસેથી કોલેજ અને હોસ્ટેલની ફી તરીકે કુલ ₹1.96 લાખ રોકડ તેમજ UPI મારફતે વસૂલ્યા હતા. પરંતુ તેમાંમાંથી માત્ર ₹32 હજાર જ યુનિવર્સિટીના સ્ટુડન્ટ પોર્ટલ પર જમા કરાવ્યા હતા, જ્યારે બાકી રહેલાં ₹1.64 લાખ પોતાની પાસે જ રાખી ચાઉ કરી લીધા હતા.
આ મામલે વાલિયા પોલીસ મથકે સિનિયર એડમિનિસ્ટ્રેટિવ અધિકારીએ રીતેશ ઠક્કર વિરુદ્ધ ફરિયાદ નોંધાવી છે. પોલીસે ગુનો દાખલ કરી વધુ તપાસ હાથ ધરી છે અને આરોપીની શોધખોળ શરૂ કરી છે.
