ભરૂચના રતન તળાવ વિસ્તારમાં મોહન બાગની સામે રહેતા એક યુવકના ઘરમાં રાત્રી દરમિયાન અજાણ્યા શખ્સે ઘૂસી ચોરી કરી ફરાર થઈ જવાની ઘટના સામે આવી છે. બનાવ અંગે એ ડિવિઝન પોલીસ મથકે ફરિયાદ નોંધાતા પોલીસે તપાસ હાથ ધરી છે.
પ્રાપ્ત માહિતી મુજબ, મૂળ કાનપુર (યુપી)ના વતની અને હાલ ભરૂચમાં રહેતા સંદીપ સંજય કઠેરીયા એક ફાઇનાન્સ કંપનીમાં નોકરી કરે છે. ગત તા. 12 એપ્રિલની રાત્રે તેઓ પોતાની માતા અને ભાઈ સાથે ઘરના દરવાજા આડા કરી સુતા હતા.
રાત્રીના અંદાજે અઢીથી ત્રણ વાગ્યાના અરસામાં તેમના ઘરના ઉપરના માળે રહેતી કિરણબેન અચાનક બુમો પાડતાં સંદીપ જાગી ગયા હતા. તે જ સમયે એક અજાણ્યો શખ્સ તેમના ઘરમાંથી દોડીને બહાર નીકળતો નજરે પડ્યો હતો. સંદીપે તરત જ તેની પાછળ દોડધામ કરી હતી, પરંતુ ચોર પોતાની બાઈક લઈને ફરાર થઈ ગયો હતો. તેમ છતાં સંદીપે બાઈકનો નંબર નોંધવામાં સફળતા મેળવી હતી.
બાદમાં ઘરની તપાસ કરતા જાણવા મળ્યું હતું કે અજાણ્યા ચોરે મોબાઇલ, પાવર બેન્ક, સ્માર્ટ વોચ અને રૂ. 8,000 રોકડા મળી કુલ અંદાજે રૂ. 23,500નો મુદ્દામાલ ચોરી કર્યો હતો.
આ બનાવ અંગે સંદીપ કઠેરીયાએ ભરૂચ એ ડિવિઝન પોલીસ મથકે ફરિયાદ નોંધાવતા પોલીસે ગુનો નોંધી અજાણ્યા આરોપીની શોધખોળ શરૂ કરી છે.
