સુરત ગ્રામ્ય પોલીસે વાહન ચોરીના વધતા બનાવોને લઈ કડક કાર્યવાહી કરતા એક મોટા ગેંગનો ભાંડો ફોડ્યો છે. એલસીબી અને પેરોલ ફલો સ્ક્વોડની સંયુક્ત કામગીરીમાં રીઢા વાહનચોર સોયેબ ઉર્ફે સોયેબ બોબડાને ઝડપી પાડવામાં આવ્યો છે અને તેની પાસેથી કુલ 7 ચોરીના વાહનો કબ્જે કરવામાં આવ્યા છે.
પોલીસ દ્વારા મળેલી બાતમીના આધારે આરોપી મુંબઈથી અમદાવાદ તરફ ચોરીના વાહનો વેચવા જતો હતો. તે દરમિયાન એનએચ-48 સર્વિસ રોડ ઉપર રેઈડ કરીને તેને ઝડપી લેવામાં આવ્યો હતો. તેની પાસેથી 4 મોટરસાયકલ અને એક ઓટોરીક્ષા મળી આવી હતી. વધુ પૂછપરછમાં આરોપીએ અન્ય જગ્યાએ છુપાવેલા વાહનો અંગે માહિતી આપતા પોલીસે વધુ બે ઓટોરીક્ષા પણ રીકવર કરી હતી.
તપાસ દરમિયાન સામે આવ્યું કે આરોપી દ્વારા સુરત ગ્રામ્ય, નવસારી અને વલસાડ જિલ્લામાં વિવિધ પોલીસ સ્ટેશનોમાં નોંધાયેલા કુલ 7 વાહન ચોરીના ગુનાઓનો ભેદ ઉકેલાયો છે.
પકડાયેલ આરોપી સોયેબ બોબડો (ઉ.વ. 28), રહેવાસી બારડોલીનો છે અને તે અગાઉ પણ અનેક વાહન ચોરીના કેસોમાં સંડોવાયેલો હોવાનું બહાર આવ્યું છે. તેના સામે કુલ 20થી વધુ ગુનાઓ નોંધાયેલા છે.
પોલીસે આરોપી પાસેથી કુલ રૂપિયા 2.95 લાખથી વધુની કિંમતનો મુદ્દામાલ કબ્જે કર્યો છે, જેમાં ઓટોરીક્ષા, મોટરસાયકલ, મોબાઈલ ફોન અને રોકડ રકમનો સમાવેશ થાય છે.
આ સફળ કામગીરી સુરત ગ્રામ્ય પોલીસના ઉચ્ચ અધિકારીઓના માર્ગદર્શન હેઠળ એલસીબી અને પેરોલ ફલો સ્ક્વોડની ટીમ દ્વારા હાથ ધરવામાં આવી હતી. હાલ પોલીસે આરોપી સામે કાયદેસરની કાર્યવાહી હાથ ધરી છે અને વધુ તપાસ ચાલુ છે.
