ભરૂચ લોકલ ક્રાઇમ બ્રાન્ચે શહેરના શક્તીનાથ સર્કલ તથા અંકલેશ્વરના ચૌટા નાકા નજીક આવેલા SBI ATM ખાતે થયેલા ATM સ્વેપિંગના બે ગુનાઓનો ભેદ ઉકેલી એક આરોપીની ધરપકડ કરી છે.
પોલીસ તપાસ દરમિયાન ઝડપાયેલા આરોપીની ઓળખ તુષાર અનિલભાઈ કોઠારી (ઉ.વ. 36), રહેવાસી આનંદ તરીકે થઈ છે. આરોપી છેલ્લા દસ વર્ષથી ATM પર વડીલ લોકોને મદદ કરવાની આડમાં તેમનો PIN જાણી ATM કાર્ડ બદલી નાખતો હતો અને બાદમાં અન્ય ATMમાંથી રૂપિયા ઉપાડી લેતો હતો.
પોલીસ મુજબ આરોપીએ 6 મે 2026ના રોજ ભરૂચના શક્તીનાથ સર્કલ પાસે આવેલા SBI ATMમાંથી એક વૃદ્ધ વ્યક્તિનું કાર્ડ બદલી ₹40,000 ઉપાડી લીધા હતા. ત્યારબાદ 9 મે 2026ના રોજ અંકલેશ્વરના ચૌટા નાકા વિસ્તારમાં પણ સમાન રીતથી ₹18,500ની છેતરપીંડી કરી હતી.
LCB ટીમને મળેલી બાતમીના આધારે ગોદી રોડ વિસ્તારમાં વોચ ગોઠવી આરોપીને ઝડપી પાડવામાં આવ્યો હતો. તેની પાસેથી રોકડ રકમ અને એક મોબાઇલ મળી કુલ ₹7,400નો મુદ્દામાલ કબજે કરવામાં આવ્યો છે.
પોલીસ તપાસમાં સામે આવ્યું છે કે આરોપી વિરુદ્ધ ભરૂચ, વડોદરા, સુરત, અમદાવાદ, આનંદ સહિત ગુજરાત અને મહારાષ્ટ્રના વિવિધ પોલીસ સ્ટેશનોમાં છેતરપીંડી, ચોરી અને ATM સ્વેપિંગના 47 જેટલા ગુનાઓ નોંધાયેલા છે.
આ સમગ્ર કામગીરી LCBના PSI એ.વી. નશિયાળીયા તથા તેમની ટીમ દ્વારા હાથ ધરવામાં આવી હતી.
