ભરૂચ જિલ્લા પોલીસ વડા તથા વડોદરા રેન્જના ઉચ્ચ અધિકારીઓની સૂચના આધારે ભરૂચ લોકલ ક્રાઈમ બ્રાન્ચ (LCB) દ્વારા ગેરકાયદેસર હથિયારો સામે ચલાવવામાં આવેલી ઝુંબેશ દરમિયાન અંકલેશ્વર GIDC વિસ્તારમાંથી ત્રણ ઇસમોને દેશી બનાવટના તમંચા સાથે ઝડપી પાડવામાં આવ્યા છે.
મળતી માહિતી મુજબ એલસીબીની ટીમ પેટ્રોલિંગમાં હતી તે દરમિયાન બાતમી મળી હતી કે સારંગપુર સોનલ પાર્ક સોસાયટીના મકાન નંબર-૧૬૮માં રહેતો ગૌરવકુમાર પ્રદીપભાઈ મંડલ પોતાના રહેણાંક મકાનમાં દેશી બનાવટનો તમંચો સંતાડી રાખ્યો છે. બાતમીના આધારે એલસીબી ટીમે તાત્કાલિક દરોડો પાડી ત્રણ ઇસમોને ઝડપી પાડ્યા હતા.
પોલીસે આરોપીઓ પાસેથી એક દેશી બનાવટનો તમંચો, ત્રણ મોબાઈલ ફોન અને અન્ય વસ્તુઓ મળી કુલ રૂ. ૨૫,૫૦૦નો મુદ્દામાલ કબજે કર્યો હતો. હથિયાર સપ્લાય કરનાર એક આરોપીને વોન્ટેડ જાહેર કરવામાં આવ્યો છે.
પકડાયેલા આરોપીઓમાં ગૌરવકુમાર પ્રદીપભાઈ મંડલ, સિકંદરકુમાર પ્રેમલાલ મંડલ અને શિવમ સિંહનો સમાવેશ થાય છે. જ્યારે પ્રભુ મંડલ નામનો શખ્સ પોલીસને વોન્ટેડ છે.
આ અંગે અંકલેશ્વર GIDC પોલીસ મથકે આર્મ્સ એક્ટ હેઠળ ગુનો નોંધી વધુ તપાસ હાથ ધરવામાં આવી છે.
આ સમગ્ર કામગીરી પો.સ.ઇ. આર.કે. ટોરાણીના માર્ગદર્શન હેઠળ એલસીબી ટીમના અધિકારીઓ અને સ્ટાફ દ્વારા ટીમવર્કથી સફળતાપૂર્વક પાર પાડવામાં આવી હતી.
