હવામાન વિભાગની આગાહી બાદ ભરૂચ જિલ્લામાં ગત મોડી રાત્રે ભારે પવન સાથે પ્રી-મોન્સૂન વરસાદ વરસ્યો હતો. અચાનક પડેલા વરસાદથી વાતાવરણમાં ઠંડક પ્રસરી જતાં લોકોને ઉકળાટભરી ગરમીમાંથી રાહત મળી હતી. વરસાદ દરમિયાન જિલ્લામાં કોઈ મોટી જાનહાનિ કે નુકસાનના અહેવાલ સામે આવ્યા નથી.
જોકે, પ્રથમ જ વરસાદે શહેર અને જિલ્લાના વિવિધ વિસ્તારોમાં પ્રી-મોન્સૂન કામગીરીની વાસ્તવિકતા સામે લાવી દીધી હતી. અનેક વિસ્તારોમાં વરસાદી પાણી ભરાઈ જવાની સમસ્યા સર્જાઈ હતી. સાથે જ ગટર અને ડ્રેનેજ વ્યવસ્થાની ખામીઓ તેમજ સફાઈ કામગીરીમાં રહેલી ઉણપો પણ સ્પષ્ટપણે જોવા મળી હતી.
શહેરના મુખ્ય કસક ગરનાળામાં ભારે પ્રમાણમાં પાણી ભરાતા વાહનચાલકો અને સ્થાનિક લોકોને હાલાકીનો સામનો કરવો પડ્યો હતો. પાણી ભરાવાની સમસ્યાને લઈ સ્થાનિક રહેવાસીઓમાં તંત્રની કામગીરી સામે અસંતોષ જોવા મળ્યો હતો.
નાગરિકોમાં માંગ ઉઠી રહી છે કે વરસાદી સિઝન શરૂ થાય તે પહેલાં જ ડ્રેનેજ, ગટર અને સફાઈ વ્યવસ્થાને વધુ મજબૂત બનાવવામાં આવે, જેથી આગામી દિવસોમાં લોકોને મુશ્કેલીઓનો સામનો ન કરવો પડે.
