ભરૂચ:
કર્મચારી ભવિષ્ય નિધિ સંગઠન (EPFO) દ્વારા સભ્યોને સમયસર અને કાર્યક્ષમ પેન્શન સેવાઓ પૂરી પાડવાની પ્રતિબદ્ધતાના ભાગરૂપે ભરૂચ પ્રાદેશિક કચેરી ખાતે “પ્રયાસ” અભિયાન અંતર્ગત નિવૃત્તિના દિવસે જ પેન્શન પેમેન્ટ ઓર્ડર (PPO) ઇશ્યૂ અને વિતરણનો વિશેષ કાર્યક્રમ યોજાયો હતો.
આ પહેલના પરિણામે નિવૃત્ત થતા કર્મચારીઓને પેન્શન મેળવવા માટે કોઈપણ પ્રકારના વિલંબનો સામનો કરવો નહીં પડે, જે તેમની સામાજિક સુરક્ષા તેમજ Ease of Livingમાં વધારો કરશે.
કાર્યક્રમ દરમિયાન નિવૃત્ત થતા કુલ 17 સભ્યોને PPOનું વિતરણ કરવામાં આવ્યું હતું. સાથે જ EPFO દ્વારા ઉપલબ્ધ વિવિધ પેન્શન સંબંધિત સેવાઓ, ડિજિટલ પેન્શન સુવિધાઓ તેમજ ડિજિટલ લાઇફ સર્ટિફિકેટ (Digital Life Certificate) ઓનલાઈન સબમિટ કરવાની પ્રક્રિયા અંગે વિગતવાર માર્ગદર્શન પણ આપવામાં આવ્યું હતું.
EPFO દ્વારા પારદર્શક, ટેકનોલોજી આધારિત અને સભ્યકેન્દ્રિત સેવા વ્યવસ્થાને વધુ મજબૂત બનાવવા માટે સતત પ્રયાસો કરવામાં આવી રહ્યા હોવાનું અધિકારીઓએ જણાવ્યું હતું.
આ કાર્યક્રમ ભરૂચ પ્રાદેશિક કચેરી ખાતે ભવિષ્ય નિધિ કમિશનર (APFC) પરિપૂર્ણ નાથ, મદદનીશ ભવિષ્ય નિધિ કમિશનર (APFC) અખિલેશ શર્મા, એકાઉન્ટ ઓફિસર ઓન્કાર ઠાકુર તેમજ નિવૃત્ત થતા કર્મચારીઓની ઉપસ્થિતિમાં યોજાયો હતો.
