ગીર સોમનાથ જિલ્લામાં ધોધમાર વરસાદ વચ્ચે જંગલના રાજા સિંહોનો પરિવાર હાઈવે પર નિર્ભય રીતે લટાર મારતો જોવા મળ્યો હતો. કોડીનાર તાલુકાના દેવળી ગામ નજીક વેરાવળ-ભાવનગર હાઈવે પર મધરાતે ચાર સિંહોની હાજરીથી વાહનચાલકોમાં આશ્ચર્ય સાથે રોમાંચનો માહોલ સર્જાયો હતો.
હાઈવે પરથી પસાર થઈ રહેલા વાહનચાલકોએ સિંહોને જોઈ પોતાના વાહનો થોભાવી દીધા હતા. કેટલાક લોકોએ આ દૃશ્ય પોતાના મોબાઈલ કેમેરામાં કેદ કર્યું હતું, જેનો વીડિયો સોશિયલ મીડિયામાં પણ વાયરલ થઈ રહ્યો છે.
સ્થાનિકોના જણાવ્યા મુજબ, કોડીનારના મજેવડી વાડી વિસ્તાર અને આસપાસના વિસ્તારમાં છેલ્લા ઘણા સમયથી સિંહોનો કાયમી વસવાટ છે. વરસાદી મોસમ દરમિયાન તેઓ ઘણીવાર જંગલમાંથી બહાર આવી રોડ અને આસપાસના વિસ્તારોમાં જોવા મળતા હોય છે.
વન વિભાગ દ્વારા વાહનચાલકોને સિંહો દેખાય ત્યારે સલામત અંતર જાળવવા, વાહનમાંથી બહાર ન નીકળવા તેમજ કોઈપણ પ્રકારની છેડછાડ ન કરવા અપીલ કરવામાં આવી છે. ગીર વિસ્તારમાં વરસાદી મોસમ દરમિયાન વન્યજીવોની અવરજવર વધતી હોવાથી ખાસ સાવચેતી રાખવાની પણ સૂચના આપવામાં આવી છે.
