ભરૂચ :
ભરૂચના ભોલાવ ગામમાં બાઈક વેચવાના બહાને ટેસ્ટ ડ્રાઈવ લેવા આવેલા શખ્સે બાઈક લઈને રફુચક્કર થઈ જતાં ચકચાર મચી હતી. જોકે, ભરૂચ સી ડિવિઝન પોલીસે ગણતરીના સમયમાં જ તપાસનો દોર ગાંધીનગર સુધી લંબાવી આરોપીને ઝડપી પાડી તેની પાસેથી ચોરી કરીને લઈ જવાયેલી નિન્ઝા બાઈક પણ કબજે કરી લીધી હતી.
ભોલાવની રંગકુટીર બંગ્લોઝ સોસાયટીમાં રહેતા અને મૂળ કેરળના ત્રિશુર જિલ્લાના વૈશાખ માધવન ટીએમ મહારાષ્ટ્રથી કાવાસાકી નિન્ઝા સ્પોર્ટ્સ બાઈક લઈને ભરૂચ આવ્યા હતા. તેઓ દહેજની રિલાયન્સ કંપનીમાં કોન્ટ્રાક્ટ આધારિત કામગીરી કરતા હતા. દરમિયાન તેમણે OLX સહિતની ઓનલાઈન એપ્લિકેશન પર બાઈક વેચાણ માટેની જાહેરાત મૂકી હતી.
આ જાહેરાત જોઈ પ્રેમપારસ દેવેન્દ્રકુમાર પટેલે બાઈક ખરીદવાની ઈચ્છા વ્યક્ત કરી વૈશાખના ઘરે મુલાકાત લીધી હતી. બાઈકની કિંમત અને કન્ડિશન અંગે વાતચીત કર્યા બાદ ટેસ્ટ ડ્રાઈવના બહાને બાઈક લઈને નીકળેલો પ્રેમપારસ પરત ફર્યો નહોતો. વૈશાખે તેનો આઈડી પ્રૂફનો ફોટો પણ લીધો હતો.
ફરિયાદના આધારે પોલીસે તપાસ હાથ ધરી આરોપી ગાંધીનગરના સરગાસણ વિસ્તારમાં હોવાનું શોધી કાઢ્યું અને તેને ઝડપી લીધો હતો. પોલીસે બાઈક પણ રિકવર કરી હતી. પ્રાથમિક તપાસમાં આરોપી સામે વડોદરાના માંજલપુર પોલીસ મથકે વર્ષ 2025માં ચોરીનો ગુનો નોંધાયો હોવાનું સામે આવ્યું છે.
