ભરૂચ :
ભરૂચ શહેરના ડભોઇયાવાડ વિસ્તારમાં એક રહેણાક મકાનના બાથરૂમની જાળીમાં ઝેરી રસેલ્સ વાઇપર સર્પ ફસાઈ જતાં પરિવારજનોમાં ચિંતા ફેલાઈ હતી. પરિવારે સર્પને અજગર સમજી વાઇલ્ડ લાઇફ રેસ્ક્યૂ ટ્રસ્ટની ભરૂચ શાખાના મુકેશ વસાવાને જાણ કરી હતી.
માહિતી મળતાં જ મુકેશ વસાવા તાત્કાલિક સ્થળ પર દોડી ગયા હતા. સ્થળ પર પહોંચીને તપાસ કરતાં જાણવા મળ્યું હતું કે, દેખાયેલો સર્પ અજગર નહીં, પરંતુ અત્યંત ઝેરી ગણાતો રસેલ્સ વાઇપર છે. આ સર્પ બાથરૂમની જાળીમાં ફસાઈ ગયો હોવાથી તેને બહાર કાઢવો જોખમી હતો.
પરિસ્થિતિની ગંભીરતાને ધ્યાનમાં રાખીને રેસ્ક્યૂ ટીમે ભારે તકેદારી સાથે સર્પને સુરક્ષિત રીતે બહાર કાઢવાની કામગીરી હાથ ધરી હતી. ત્યારબાદ વનવિભાગના માર્ગદર્શન હેઠળ તેને સુરક્ષિત કુદરતી સ્થળે મુક્ત કરવાની કવાયત હાથ ધરવામાં આવી હતી.
આ ઘટનાને પગલે રહેણાક વિસ્તારમાં સર્પ દેખાય ત્યારે ગભરાઈને જાતે પકડવાનો કે તેને નુકસાન પહોંચાડવાનો પ્રયાસ કરવાને બદલે નિષ્ણાત રેસ્ક્યૂ ટીમની મદદ લેવી જરૂરી હોવાનું ફરી એકવાર સામે આવ્યું છે. રસેલ્સ વાઇપર ઝેરી સર્પ હોવાથી તેની નજીક જવું જોખમી બની શકે છે. આવા સમયે સાવચેતી રાખવી અને તાત્કાલિક નિષ્ણાતોને જાણ કરવી હિતાવહ છે.
